Kreu i LZHK-së, Dashamir Shehi e konsideron “turp të madh” faktin që partitë politike kanë nxjerrë mbështetësit e tyre për të protestuar para SPAK-ut.
“Turp i madh. Të nxjerrësh tufën e besnikëve e të godasësh një nga elementët e shtetit. Drejtësia është pushtet më vete dhe këto zotërinjtë nuk kanë pushtet mbi atë. Është krijuar për t’i kontrolluar këta. Këta e duan shtetin si vegël që ta përdorin vetë. Këta janë njerëz që kanë paratë, kanë mediat, kanë lidhje ndërkombëtare, kanë avokatët më të mirë… Çfarë frike e kanë drejtësinë këta? Frikë e ka ai hallexhiu që është plagosur me komshiun. E vetmja drejtësi që funksionon pak, të dy palët i janë turrur”, tha Shehi për “A2 CNN”.
I pyetur nëse ka diçka që nuk shkon te drejtësia në Shqipëri, Shehi u përgjigj duke thënë se dosjet e prapambetura në Gjykatë dhe të vonuara prej 10 vitesh tregon se nuk ka drejtësi.
Ai shton se kryeministri Rama i frikësohet SPAK pasi kuptoi se Prokuroria e Posaçme e ka seriozisht me arrestimet e fundit.
“Ka shumë gjëra që nuk shkojnë. Në Gjykatën e Lartë ka mbi 35 mijë dosje pronarësh që presin të marrin mallin e vet. Në gjykatat e apelit ka mijëra dosje dhe për të marrë një rrogë mund të presësh 10 vjet. Kjo nuk është më drejtësi pastaj. A keni parë të bëjnë ndonjë demonstratë për këto? Kryeministri u kujtua kur e ngacmuan te kryetari i Bashkisë. Tani që e kuptuan që këta te merrkan, janë trembur dhe kanë nisur t’i bien. Janë ortakë të dy palët. Demonstrata njësoj bëjnë, vetëm njerëzit ndryshojnë”, u shpreh Shehi.
Sipas kreut të LZHK-së, në Shqipëri “nuk mund të bëhet drejtësi perfekte”, por “duhet lënë të punojë dhe do të vetërregullohet”.
