Sulmet ruse me dron kanë dëmtuar një termocentral në Mykolaiv në jug të Ukrainës gjatë natës, duke lënë të paktën 100,000 banorë pa ngrohje, ndërsa temperaturat shënojnë nën zero, thanë sot zyrtarë të lartë ukrainas.
“Kjo nuk ka të bëjë fare me luftimet dhe situatën në front, por dëshmon edhe një herë se rusët po luftojnë kundër popullit tonë dhe kundër jetës në Ukrainë”, tha Presidenti Volodymyr Zelensky në mesazhin Telegram, shkruan Reuters.
Më herët, kryeministri Denis Shmyhal tha se sulmi ndaj termocentralit është kryer qëllimisht për të lënë zonën pa ngrohje në temperatura nën zero dhe për të shkaktuar një katastrofë humanitare.
Rusia sulmoi Ukrainën me 143 dronë gjatë natës, por forcat e armatosura ukrainase njoftuan se rrëzuan 95 prej tyre, ndërsa 46 të tjera nuk arritën objektivat e tyre.
Të paktën një person u plagos në sulmet e natës që shkaktuan dëme në zonën e Kievit, thanë zyrtarët ukrainas. Temperatura në Mykolaiv sonte pritet të zbresë deri në minus 7 gradë Celsius.
Zelensky u bëri thirrje përsëri aleatëve perëndimorë që t’i japin Ukrainës më shumë mbrojtje ajrore, me Rusinë, e cila aktualisht ka pushtuar 20% të territorit ukrainas dhe po përparon drejt lindjes, ndërsa pushtimi në shkallë të plotë i Moskës po bën gati tre vjet.
Aktualisht nuk ka asnjë koment nga ana e Rusisë.
Të dyja palët mohojnë të kenë shënjestruar civilët në luftën që Rusia filloi me pushtimin e saj të Ukrainës gati tre vjet më parë.
“Evropa dhe bota duhet të mbrohen më mirë nga kjo e keqe dhe të përgatiten për t’u përballur me të”, tha Zelensky në postimin e tij në Telegram.
“Së bashku me Evropën, SHBA-në dhe të gjithë partnerët tanë, ne mund ta përfundojmë këtë luftë me një paqe të drejtë dhe të qëndrueshme”, tha Zelensky.
