Presidenti francez, Emmanuel Macron, ka deklaruar se Franca po përballet me situatën më të rëndë të zjarreve që prej përfundimit të Luftës së Dytë Botërore. Gjatë një vizite në Qendrën e Operacioneve të Zjarrfikjes dhe Shpëtimit në Bordo, në rajonin Gironde, një nga zonat më të goditura nga flakët, kreu i shtetit falënderoi ekipet e emergjencës dhe vendet që kanë ofruar mbështetje në përballimin e krizës.
Macron e cilësoi situatën si të paprecedentë, duke theksuar se kushtet ekstreme klimatike dhe thatësira e zgjatur e javëve të fundit kanë rritur ndjeshëm rrezikun e zjarreve në të gjithë vendin.
Presidenti francez paralajmëroi se javët në vijim pritet të jenë po aq sfiduese, duke bërë thirrje për vigjilencë, reagim të shpejtë dhe këmbëngulje në përballimin e emergjencës. Sipas tij, vetëm një angazhim i vazhdueshëm mund të ndihmojë në kufizimin e pasojave të kësaj krize të rëndë natyrore.
