Një peticion online që kërkon përjashtimin e përhershëm të kombëtares së Argjentinës nga Kupat e Botës ka marrë përmasa të mëdha në rrjet, duke u shndërruar në një nga nismat më të komentuara pas përfundimit të Botërorit 2026.
Fushata, e njohur me emrin “Kick Argentina Out” (“Përjashtojeni Argjentinën”), u krijua gjatë zhvillimit të turneut dhe, sipas organizatorëve, është nënshkruar nga 23.316.108 persona nga rreth 170 vende të botës. Megjithatë, kjo shifër nuk është verifikuar në mënyrë të pavarur dhe mbetet vetëm një pretendim i organizatorëve të peticionit.
Nisma lindi si reagim ndaj pakënaqësisë së një pjese të tifozëve, të cilët pretendonin se vendimet e arbitrave në ndeshjet e Argjentinës favorizonin kampionët e botës dhe veçanërisht kapitenin Lionel Mesi. Në tekstin e peticionit ngrihej akuza se Argjentina gëzonte një trajtim të privilegjuar dhe vihej në pikëpyetje integriteti i garës, duke pretenduar se fituesi ishte i paracaktuar.
Fushata u mbyll menjëherë pas finales së Kupës së Botës, ku Spanja mposhti Argjentinën me rezultatin 1-0 pas kohës shtesë, duke fituar trofeun.
Pretendimet për mbi 23 milionë firma u pasqyruan edhe nga disa media ndërkombëtare, mes tyre RMC Sport, Euronews dhe Goal. Nëse do të konfirmohej, kjo shifër do ta rendiste peticionin mes më të mëdhenjve në histori, pranë rekordit botëror të nismës “Jubilee 2000”, e cila mblodhi mbi 24 milionë nënshkrime për faljen e borxheve të vendeve më të varfra.
Megjithatë, nuk ekziston asnjë provë publike që konfirmon numrin e nënshkruesve. Organizatorët nuk kanë publikuar listën e firmëtarëve dhe nuk kanë sqaruar mënyrën se si janë verifikuar identitetet apo si janë shmangur nënshkrimet e dyfishta. Për këtë arsye, shifra duhet të konsiderohet si një pretendim dhe jo si një fakt i konfirmuar.
Pavarësisht jehonës që mori në rrjetet sociale, peticioni nuk ka asnjë vlerë ligjore apo sportive. Ai nuk është iniciuar nga FIFA apo ndonjë federatë futbolli dhe nuk mund të ndikojë në pjesëmarrjen e Argjentinës në kompeticionet ndërkombëtare.
Kritikat ndaj Argjentinës u shtuan gjatë turneut, sidomos pas fitores 3-2 ndaj Egjiptit në fazën e 1/8-ve. Kombëtarja egjiptiane kundërshtoi anulimin e një goli dhe përdorimin e sistemit VAR, ndërsa trajneri Hossam Hassan akuzoi publikisht organizatorët se po favorizonin Argjentinën për të mbajtur Lionel Mesin në garë. FIFA hodhi poshtë këto pretendime, duke deklaruar se nuk kishte asnjë provë që vinte në dyshim integritetin e arbitrimit.
Debatet u intensifikuan edhe për shkak të lojës agresive të argjentinasve, incidenteve të shumta me kundërshtarët dhe tensioneve që shpërthyen pas finales. Në rrjetet sociale qarkulluan një numër i madh videosh, fotografish dhe teorish konspirative, disa prej të cilave rezultuan të manipuluara ose të krijuara me inteligjencë artificiale.
Pas finales, situata u përshkallëzua edhe më tej me përleshjet mes futbollistëve të Argjentinës dhe Spanjës. Leandro Paredes u përfshi në një incident me Eric Garcia dhe Gavi, ndërsa Nahuel Molina dhe ndihmëstrajneri Roberto Ajala u bënë gjithashtu pjesë e tensioneve në fushë. Ky i fundit u përplas me Dani Olmo, për të cilin më vonë kërkoi falje publike, duke pranuar se kishte humbur kontrollin e emocioneve.
Ndërkohë, FIFA ka nisur një procedurë disiplinore për ngjarjet e ndodhura pas finales, e cila mund të sjellë pezullime për lojtarët dhe anëtarët e stafit, si edhe sanksione financiare ndaj Federatës Argjentinase të Futbollit.
