Barcelona vazhdon të jetë një nga klubet më aktive në afatin kalimtar veror, duke vijuar përforcimet për sezonin e ri.
Pas afrimit të Karim Adeyemit, klubi katalanas ka arritur marrëveshje edhe për transferimin e talentit 18-vjeçar Jesse Bisiou nga Club Brugge.
Lajmi është konfirmuar nga gazetari i njohur Fabrizio Romano, i cili ka bërë të ditur se marrëveshja mes dy klubeve është finalizuar dhe aktualisht po shkëmbehet dokumentacioni përkatës, përpara se lojtari t’u nënshtrohet testeve mjekësore.
Sipas raportimeve, Barcelona do të paguajë 8.5 milionë euro për kartonin e anësorit belg, ndërsa Club Brugge do të mbajë 20 për qind të vlerës së një transferimi të ardhshëm të futbollistit.
Bisiou pritet të udhëtojë drejt Barcelonës në ditët në vijim për të kryer vizitat mjekësore dhe më pas do të firmosë kontratën me klubin katalanas, duke kompletuar zyrtarisht transferimin.
Drejtori sportiv Deco ka qenë një nga mbështetësit kryesorë të kësaj lëvizjeje, e cila përputhet me strategjinë e Barcelonës për të investuar te futbollistët e rinj dhe premtues, pa lënë pas dore forcimin e ekipit të parë.
