Një debat i tensionuar është zhvilluar gjatë mbledhjes së Komisionit për Nismat Qytetare, Bashkëpunimin dhe Mbikëqyrjen Institucionale në Kuvend, ku u përballën kryetari i komisionit, Fatmir Xhafaj, dhe Avokati i Popullit, Endrit Shabani.
Përplasja mes tyre nisi gjatë diskutimit mbi zbatimin e rekomandimeve të institucionit të Avokatit të Popullit dhe mënyrën e bashkëpunimit me institucionet shtetërore.
Gjatë shkëmbimit të replikave, Xhafaj i kërkoi Shabanit të ndryshonte mënyrën e komunikimit, duke theksuar se diskutimi duhet të zhvillohej në frymën e një raportimi institucional dhe jo në formën e një debati politik.
“Ndrysho gjuhën, mos më fol si kryetar partie”, mësohet t’i ketë thënë Xhafaj Avokatit të Popullit gjatë debatit në komision.
Nga ana tjetër, Shabani vijoi të paraqiste qëndrimet e tij lidhur me përgjegjësitë e institucioneve për zbatimin e rekomandimeve dhe nevojën për një reagim më të madh nga administrata publike.
Diskutimet në komision u përqendruan te roli i institucioneve të pavarura, respektimi i rekomandimeve të Avokatit të Popullit dhe mekanizmat e mbikëqyrjes institucionale.
Mbledhja vijoi me debate mes palëve, ndërsa anëtarët e komisionit diskutuan për çështjet e ngritura dhe hapat që duhet të ndërmerren për përmirësimin e bashkëpunimit mes institucioneve.
Debati:
Shabani: Vetëm 21% e rekomandimeve të Avokatit të Popullit zbatohen. Nëse ju jeni të kënaqur në lidhje me këtë performancë, unë nuk jam.
Xhafaj: Me çfarë jemi të kënaqur ne dhe me çfarë jo… Duhet ta ndryshosh gjuhën, se po më flet këtu sikur je kryetar i partisë, jo Avokat i Popullit.
Shabani: Unë kam ardhur të përfaqësoj institucionin tim, ky koment nuk ju nderon. Nuk jam politikan.
Shabani: Nuk kemi ardhur këtu të tregojmë çfarë kam bërë unë dhe ju në të shkuarën.
