Spanja siguroi një vend në finalen e Kupës së Botës pas një paraqitjeje bindëse ndaj Francës, duke konfirmuar edhe një herë statusin e saj si një nga skuadrat më të forta të momentit. Loja e “La Roja” mori vlerësime të shumta nga emra të njohur të futbollit botëror, të cilët nuk kursyen elozhet për kampionët e Europës.
Thierry Henry vlerësoi superioritetin e spanjollëve, duke theksuar se ata e kontrolluan ndeshjen nga fillimi në fund.
“Spanja tregoi pse është kampione e Europës. Ata kontrolluan ndeshjen me dhe pa top. Ishin shumë më superiorë, nuk ka asgjë më shumë për të thënë. Duhet të mendojmë më mirë se si të luajmë kundër tyre”, u shpreh ish-sulmuesi francez.
Henry rezervoi fjalë të veçanta edhe për Mikel Oyarzabal dhe Marc Cucurella, duke theksuar se ky i fundit zhvilloi një ndeshje të jashtëzakonshme në krahun e majtë.
“Njerëzit nuk i japin Oyarzabalit respektin që meriton sepse luan te Real Sociedad. Ndërsa Cucurella është i pabesueshëm. Shumë e kritikojnë, por askush nuk mund ta kalonte. Të luash me karton të verdhë që nga minuta e 30-të dhe të fitosh duelet ndaj Olise e Dembélé… ai i kishte në xhep”, deklaroi Henry.
Edhe Zlatan Ibrahimović vlerësoi forcën kolektive të skuadrës së Luis de la Fuente, duke nënvizuar se suksesi i saj nuk mbështetet te një individ.
“Kur flasim për Spanjën, nuk flasim vetëm për një lojtar. Ylli është skuadra. Ata kanë Lamine Yamal, por nuk varen nga ai. Gjithçka e bëjnë si ekip. Rodri është rikthyer në formën e tij më të mirë dhe ka treguar pse është fitues i Topit të Artë. Është lojtari që çdo skuadër do të donte ta kishte”, tha suedezi.
Gary Neville pranoi se ishte befasuar nga dominimi i plotë i Spanjës ndaj Francës, duke theksuar diferencën e madhe mes dy ekipeve.
“Besoj se të gjithë mendonim se Franca do ta fitonte ndeshjen, por ajo u shkatërrua plotësisht. Ishte një paraqitje e jashtëzakonshme e Spanjës. Diferenca u pa qartë te mbrojtësit e krahut. Cucurella dhe Pedro Porro ishin fantastikë kundër anësorëve francezë, ndërsa Lucas Digne pati shumë vështirësi”, u shpreh ish-mbrojtësi anglez.
