Ministria e Arsimit ka përcaktuar datat zyrtare për vitin e ri shkollor 2026-2027. Shkollat e arsimit parauniversitar në të gjithë vendin do të hapin dyert për nxënësit më 14 shtator 2026.
Sipas urdhrit të përbashkët të Ministrisë së Arsimit dhe Ministrisë së Ekonomisë, procesi mësimor për arsimin bazë dhe arsimin e mesëm të lartë do të nisë në të njëjtën datë dhe do të përfundojë më 18 qershor 2027.
Për nxënësit e klasave të maturës, viti shkollor do të përfundojë më herët. Mësimi për maturantët do të mbyllet më 4 qershor 2027, pasi më pas do të nisë periudha e përgatitjes dhe zhvillimit të provimeve të Maturës Shtetërore.
Provimet e Maturës Shtetërore janë planifikuar të zhvillohen nga data 7 deri më 28 qershor 2027, ndërsa provimet kombëtare të arsimit bazë do të mbahen nga 21 deri më 30 qershor 2027.
Kalendari i ri përcakton edhe periudhat e pushimeve gjatë vitit shkollor. Pushimet dimërore për të gjitha nivelet e arsimit parauniversitar do të nisin më 24 dhjetor 2026 dhe do të zgjasin deri më 4 janar 2027.
Për nxënësit e arsimit bazë janë parashikuar edhe pushimet pranverore, të cilat do të zhvillohen nga 29 marsi deri më 2 prill 2027.
Në të njëjtin dokument janë përcaktuar edhe datat për arsimin profesional. Mësimi në shumicën e strukturave të arsimit profesional do të nisë më 14 shtator 2026, ndërsa për disa programe të arsimit pas të mesëm procesi mësimor mund të fillojë deri në javën e tretë të tetorit.
Provimet përfundimtare për nxënësit e arsimit profesional do të zhvillohen gjatë muajve maj dhe qershor 2027. Ndërkohë, provimet e Maturës Profesionale do të zhvillohen në të njëjtën periudhë me Maturën Shtetërore, nga 7 deri më 28 qershor.
Vendimi për kalendarin e ri shkollor është publikuar në Fletoren Zyrtare dhe përcakton strukturën e plotë të vitit akademik për të gjitha institucionet e arsimit parauniversitar në vend.
