Alireza Beiranvand vazhdon të shkruajë historinë e tij të jashtëzakonshme në futbollin botëror. Portieri 33-vjeçar i Iranit ishte figura kryesore në barazimin 0-0 ndaj Belgjikës në Kupën e Botës 2026, duke realizuar një sërë pritjesh spektakolare që i siguruan skuadrës së tij një pikë me peshë të madhe.
Momenti që bëri diferencën erdhi në minutën e 59-të, kur gardiani iranian ndali në mënyrë fantastike një goditje të rrezikshme të Maksim De Kujper, duke shmangur një gol që dukej i pashmangshëm. Paraqitja e tij brilante u vlerësua me çmimin “Lojtari i Ndeshjes”, por suksesi i sotëm është vetëm kapitulli më i fundit i një historie që duket si e marrë nga një film.
Rrugëtimi i Beiranvand drejt majave të futbollit ka qenë i mbushur me sakrifica. I lindur në provincën Lorestan të Iranit, ai u rrit në një familje të thjeshtë barinjsh. Në fëmijëri kalonte ditët duke ruajtur delet, ndërsa ëndërronte të bëhej futbollist profesionist. Babai i tij nuk e mbështeste këtë dëshirë dhe këmbëngulte që djali të zgjidhte një profesion më të sigurt për të ardhmen.
Megjithatë, Beiranvand nuk hoqi dorë nga ëndrra. Ende adoleshent, ai u largua nga shtëpia dhe udhëtoi drejt Teheranit me para të marra hua. Ditët e para në kryeqytet ishin tepër të vështira. Pa strehë dhe pa të ardhura, ai flinte pranë qendrave stërvitore apo në zonën e Sheshit Azadi, ndërsa përpiqej të gjente një mundësi për të hyrë në botën e futbollit.
Për të mbijetuar, punoi në profesione të ndryshme. Ka larë makina, ka punuar në piceri, ka pastruar rrugë dhe ka qenë ndihmës në një punishte rrobaqepësie. Për shkak të shtatlartësisë së tij, shpesh i caktonin larjen e automjeteve të mëdha. Megjithatë, asnjë prej këtyre vështirësive nuk e largoi nga objektivi i tij.
Pas shumë vitesh përpjekjesh, ai arriti të depërtojë në futbollin profesionist dhe gradualisht u shndërrua në portierin numër një të kombëtares iraniane. Emri i tij mori famë ndërkombëtare gjatë Kupës së Botës 2018, kur priti penalltinë e legjendës portugeze Kristiano Ronaldo në ndeshjen mes Iranit dhe Portugalisë. Ai moment mbeti i paharrueshëm për tifozët iranianë dhe u rikrijua madje edhe në seriale televizive vendase.
Historia e tij e jashtëzakonshme frymëzoi edhe realizimin e filmit biografik “Bejro”, i cili rrëfen rrugëtimin nga varfëria ekstreme drejt skenës më të madhe të futbollit botëror.
Përveç sukseseve në fushë, Beiranvand ka hyrë edhe në Librin e Rekordeve Guinness. Ai mban rekordin për hedhjen më të gjatë të topit me duar në futboll, me 61.26 metra, si dhe rekordin për goditjen më të gjatë të topit nga duart e portierit, me 78.014 metra.
Karriera e tij nuk ka qenë gjithmonë e qetë. Në periudha të ndryshme është përballur me kritika të forta dhe polemika, ndërsa nuk kanë munguar as zërat që kërkonin largimin e tij nga kombëtarja. Por ndaj Belgjikës ai dha përgjigjen më të mirë të mundshme, duke treguar se vazhdon të jetë një nga figurat më të rëndësishme të futbollit iranian.
Nga një djalë që ruante delet në malet e Lorestanit, Alireza Beiranvand është shndërruar në një hero kombëtar dhe në një nga historitë më frymëzuese të Kupës së Botës 2026.
