Qendra Presidenciale e ish-presidentit amerikan Barack Obama ka hapur zyrtarisht dyert në Çikago, në një ceremoni madhështore që mblodhi katër ish-presidentë të Shteteve të Bashkuara, personalitete të njohura ndërkombëtare dhe emra të famshëm të botës së artit dhe kulturës.
Në aktivitet morën pjesë ish-presidentët Joe Biden, Bill Clinton dhe George W. Bush, së bashku me bashkëshortet e tyre, ndërsa mungesa e presidentit aktual Donald Trump u vu menjëherë në qendër të vëmendjes. Sipas organizatorëve, Trump nuk ishte i ftuar në këtë ceremoni.
Ngjarja, e konceptuar si një festë për trashëgiminë politike dhe shoqërore të Obamës, mori edhe tone të forta politike përmes fjalimeve të Barack dhe Michelle Obama, të cilët kritikuan në mënyrë të tërthortë presidentin aktual amerikan.
Michelle Obama mbajti një nga fjalimet më emocionale të mbrëmjes, duke kujtuar sulmet dhe teoritë konspirative që, sipas saj, janë përdorur ndër vite kundër bashkëshortit të saj. Ajo iu referua akuzave të mëhershme që vinin në dyshim vendlindjen e Barack Obamës dhe vlerësoi mënyrën se si ai përballoi presionet gjatë presidencës.
Ish-Zonja e Parë renditi një sërë arritjesh të administratës Obama, duke përmendur reformën në sistemin shëndetësor, rimëkëmbjen ekonomike pas krizës financiare, përfundimin e një konflikti ushtarak, operacionin kundër Osama bin Ladenit dhe mbështetjen për industrinë amerikane të automobilëve.
Edhe Barack Obama shfrytëzoi rastin për të dhënë mesazhe të forta mbi rëndësinë e demokracisë, institucioneve dhe respektimit të Kushtetutës. Pa përmendur drejtpërdrejt Donald Trumpin, ai theksoi se ushtria, organet e rendit dhe institucionet shtetërore duhet t’i shërbejnë ligjit dhe qytetarëve, jo interesave të një individi apo force politike.
Obama nënvizoi se demokracia mbështetet te zgjedhjet e lira, drejtësia e pavarur, media e lirë dhe transferimi paqësor i pushtetit, duke paralajmëruar se humbja e besimit te këto institucione krijon terren për abuzim me pushtetin.
Ceremonia u shoqërua edhe nga prania e figurave të njohura ndërkombëtare, mes tyre ish-kancelarja gjermane Angela Merkel, ish-kryeministri kanadez Justin Trudeau dhe ish-kryeministri italian Matteo Renzi.
Ngjarja mori përmasa të mëdha kulturore me pjesëmarrjen e emrave të njohur të kinemasë dhe muzikës, si Tom Hanks, Anne Hathaway, Steven Spielberg, George Lucas, Bruce Springsteen, Stevie Wonder, Christina Aguilera, Jennifer Hudson, Bono, The Edge dhe Eddie Vedder.
Megjithëse ceremonia kishte në fokus inaugurimin e qendrës presidenciale, mesazhet politike të Barack dhe Michelle Obama e shndërruan aktivitetin në një demonstrim të qartë të vizionit të tyre për demokracinë amerikane dhe në një kritikë të nënkuptuar ndaj administratës së Donald Trumpit.
