Vetëm pak orë para nisjes së Kupës së Botës 2026, Meksika është tronditur nga një sulm i rëndë i armatosur që ka rikthyer në qendër të vëmendjes problemin e dhunës së lidhur me kartelet e drogës. Pesë efektivë policie mbetën të vrarë dhe disa të tjerë u plagosën pas një prite të përgjakshme në shtetin perëndimor të Miçoakanit, një nga rajonet më problematike të vendit për sa i përket aktivitetit kriminal.
Sipas autoriteteve lokale, sulmi ndodhi në komunën Nahuatzen, një zonë e banuar kryesisht nga komuniteti indigjen Purepeça dhe e njohur për praninë e grupeve të fuqishme kriminale. Automjeti me të cilin udhëtonin policët u sulmua me breshëri armësh, ndërsa pamjet filmike të publikuara nga mediat tregojnë mjetin e shpuar nga dhjetëra plumba.
Autoritetet meksikane dyshojnë se pas sulmit qëndrojnë anëtarë të kartelit famëkeq “Jalisco Nueva Generación”, një nga organizatat kriminale më të fuqishme dhe më të dhunshme në Amerikën Latine. Menjëherë pas ngjarjes, Departamenti i Sigurisë i shtetit të Miçoakanit njoftoi nisjen e një operacioni të gjerë për identifikimin dhe arrestimin e autorëve.
Miçoakani konsiderohet një rajon me rëndësi të madhe ekonomike për Meksikën. Ai është prodhuesi kryesor i avokados në vend, me një industri që gjeneron miliarda dollarë çdo vit, si dhe një qendër e rëndësishme për prodhimin e agrumeve dhe aktivitetin portual në brigjet e Oqeanit Paqësor. Megjithatë, krahas ekonomisë së ligjshme, zona është kthyer prej vitesh në një bastion të krimit të organizuar, ku janë të përhapura zhvatjet, trafiku i drogës, rrëmbimet dhe rekrutimi i detyruar i të rinjve nga grupet kriminale.
Ngjarja vjen në një moment delikat për Meksikën, e cila së bashku me Shtetet e Bashkuara dhe Kanadanë po pret Kupën e Botës 2026. Kryeqyteti i shtetit, Morelia, ndodhet rreth 300 kilometra larg qyteteve që do të presin ndeshjet e turneut, përfshirë Guadalajara-n dhe Mexico City-n, ku do të zhvillohet ceremonia hapëse në stadiumin legjendar Azteca.
Për shkak të përkeqësimit të situatës së sigurisë, qeveria meksikane ka shtuar praninë ushtarake në rajon. Aktualisht, rreth 12 mijë ushtarë janë dislokuar në Miçoakan dhe zonat përreth për të luftuar aktivitetin e karteleve dhe për të garantuar rendin publik.
Ky sulm është një tjetër dëshmi e sfidave serioze me të cilat përballet Meksika në prag të ngjarjes më të madhe sportive në botë. Ndërsa miliona tifozë po përgatiten të ndjekin spektaklin e futbollit, autoritetet vazhdojnë përpjekjet për të garantuar sigurinë dhe për të parandaluar që dhuna e karteleve të errësojë imazhin e vendit gjatë Botërorit 2026.
