Kryeministri Edi Rama ka reaguar sërish për protestat kundër projektit të planifikuar në Zvërnec, këtë herë duke komentuar pankartat dhe memet e përdorura nga qytetarët gjatë tubimeve të fundit në Tiranë.
Në një postim në rrjetet sociale, Rama publikoi disa prej pankartave të shfaqura në protestë dhe tha se, ndonëse nuk pajtohet me mesazhet e kundërshtarëve të projektit, vlerëson kreativitetin e autorëve të memeve dhe materialeve satirike.
Kreu i qeverisë u shpreh me ironi se nuk i pëlqejnë fjalimet që, sipas tij, përhapin skenarë alarmues për projektin, por shtoi se e argëton mënyra krijuese me të cilën protestuesit kanë ndërtuar pankartat dhe mesazhet e tyre.
“Rroftë mememania”, shkroi Rama, duke theksuar se disa prej materialeve satirike i konsideron mjaft origjinale dhe se meritonin përgëzime për autorët.
Në reagimin e tij, kryeministri përsëriti qëndrimin se kundërshtimet ndaj investimit në Zvërnec bazohen në atë që ai e cilëson si frikëra dhe rreziqe të paqena, ndërsa mbrojti projektin duke deklaruar se ai do të kontribuojë në transformimin e mëtejshëm të Shqipërisë si destinacion turistik.
Deklarata vjen në një kohë kur protestat kundër projektit në Zvërnec kanë hyrë në ditët e tyre të njëpasnjëshme, me qytetarët që kërkojnë ndalimin e investimit dhe ndryshime në politikat që lidhen me zonat e mbrojtura.
