Situata në Lindjen e Mesme ka hyrë në një fazë të re tensionesh, ndërsa në Israel pritet mbledhja urgjente e Këshillit të Sigurisë nën drejtimin e kryeministrit Benjamin Netanyahu, mes raportimeve për përgatitje të mundshme për një përshkallëzim të ri me Iran.
Në të njëjtën kohë, Netanyahu ka zhvilluar një bisedë telefonike me presidentin amerikan Donald Trump, gjatë së cilës janë diskutuar zhvillimet e fundit ndërkombëtare, përfshirë vizitën e tij në Pekin dhe takimin me presidentin kinez Xi Jinping.
Sipas raportimeve, komunikimi mes dy liderëve është fokusuar në analizimin e situatës rajonale, veçanërisht pas sulmit me dron pranë një objekti bërthamor në Emiratet e Bashkuara Arabe, që ka rritur shqetësimet për sigurinë në rajon.
Netanyahu ka deklaruar se Izraeli mbetet në gatishmëri të plotë për çdo skenar të mundshëm dhe se zhvillimet me Iranin po ndiqen me vëmendje maksimale nga autoritetet izraelite.
Nga ana e tij, Trump ka informuar mbi bisedimet e zhvilluara në Kinë me presidentin Xi Jinping, ku sipas tij janë prekur edhe çështje të ndjeshme globale, përfshirë sigurinë energjetike dhe stabilitetin në Ngushticën e Hormuzit.
Sipas deklarimeve të cituara, është diskutuar edhe mundësia e rolit të Kinës në zbutjen e tensioneve në rajon, përfshirë çështjen e lëvizjes së lirë në rrugët strategjike të naftës.
Pas kthimit nga Pekini, Trump ka publikuar gjithashtu një imazh në rrjetet sociale të krijuar me inteligjencë artificiale, ku shfaqet në një skenë detare me anije ushtarake, shoqëruar me mesazhin simbolik “qetësia para stuhisë”, duke shtuar më tej spekulimet për zhvillimet e ardhshme gjeopolitike.
