Presidenti rus Vladimir Putin pritet të vizitojë së shpejti Kinën, në një udhëtim që Kremlini e ka konfirmuar si thuajse të përfunduar në aspektin organizativ. Sipas zëdhënësit të presidencës ruse, Dmitry Peskov, përgatitjet për vizitën janë drejt finalizimit dhe mbeten vetëm detajet e fundit për shpalljen zyrtare të datave, në koordinim me palën kineze.
Duke folur në një konferencë për shtyp në Moskë, Peskov deklaroi se vizita është në fazën përfundimtare të përgatitjeve dhe do të zhvillohet në një të ardhme shumë të afërt. “Do t’i shpallim së shpejti. Përgatitjet kanë përfunduar pothuajse plotësisht, kanë mbetur vetëm detajet e fundit,” u shpreh ai.
Sipas agjencisë Reuters, Putin dhe presidenti kinez Xi Jinping kanë zhvilluar dhjetëra takime ndër vite, duke forcuar një partneritet strategjik mes Moskës dhe Pekinit, i cili u shpall “pa kufizime” në shkurt të vitit 2022, pak para nisjes së luftës në Ukrainë.
Takimi më i fundit i njohur mes dy liderëve është zhvilluar më 4 shkurt 2026 përmes një videokonference, ku janë diskutuar çështje të sigurisë globale, bashkëpunimit ekonomik dhe koordinimit politik në arenën ndërkombëtare.
