Në seancën e radhës në Gjykatën e Posaçme Kundër Korrupsionit dhe Krimit të Organizuar, Ilir Meta ka marrë një tjetër goditje nga drejtësia, pasi gjykata vendosi të mos ndryshojë masën e sigurisë “arrest në burg”, duke e lënë sërish në paraburgim kreun e Partisë së Lirisë.
Debatet në sallën e gjyqit u përqendruan kryesisht tek kërkesa e mbrojtjes për zbutjen e masës së sigurisë. Avokati mbrojtës, Kujtim Cakrani, argumentoi se paraburgimi i gjatë ndaj Metës nuk justifikohet më, duke theksuar se ish-presidenti ka afro 19 muaj në qeli, ndërkohë që procesi gjyqësor në themel ende nuk ka nisur.
Sipas avokatit, Prokuroria e Posaçme nuk ka sjellë prova konkrete që të provojnë se Meta mund të ndikojë tek dëshmitarët apo të dëmtojë hetimet. Ai i cilësoi pretendimet e SPAK-ut si spekulative dhe pa bazë konkrete, duke kërkuar një masë më të butë sigurie për klientin e tij.
Në argumentet e paraqitura para trupës gjykuese, mbrojtja iu referua edhe rastit të ish-drejtoreshës së AKSHI-t, Mirlinda Karçanaj, për të cilën Gjykata e Lartë vendosi zbutje të masës së sigurisë, edhe pse ajo akuzohej për vepra më të rënda, përfshirë “grupin kriminal”.
Ndërkohë, vetë Ilir Meta mungoi në seancë. Sipas avokatit të tij, arsyeja lidhej me mungesën e besimit që ish-presidenti ka ndaj procesit gjyqësor dhe trupës së gjykimit.
Nga ana tjetër, prokurori i SPAK-ut, Sotir Kllapi, kundërshtoi ashpër kërkesën e mbrojtjes, duke deklaruar se nuk ekziston asnjë rrethanë e re që të justifikojë ndryshimin e masës së sigurisë. Sipas tij, mbrojtja nuk solli prova konkrete, por vetëm interpretime të përgjithshme juridike.
Prokurori theksoi se aktiviteti kriminal për të cilin akuzohet Meta shtrihet në një periudhë të gjatë kohore, nga viti 2009 deri në vitin 2017, çka sipas SPAK-ut tregon rrezikshmëri të lartë shoqërore.
Kllapi deklaroi gjithashtu se edhe Gjykata Kushtetuese, në shqyrtimin e mëparshëm të çështjes, e ka konsideruar proporcionale masën e sigurisë ndaj Metës. Për këtë arsye, SPAK kërkoi rrëzimin e kërkesës për lirimin ose zbutjen e masës.
Pas dëgjimit të palëve, Gjykata e Posaçme vendosi të pranojë kërkesën e prokurorisë dhe të lërë në fuqi masën “arrest në burg” për Ilir Metën, duke rrëzuar kështu edhe përpjekjen e radhës të ish-presidentit për të dalë nga qelia.
