Presidenti i Brazilit, Luiz Inasio Lula da Silva, ka mbërritur në Shtëpinë e Bardhë për një takim të nivelit të lartë me presidentin e Shteteve të Bashkuara të Amerikës, Donald Trump, në një përpjekje për të zbutur tensionet e rritura tregtare mes dy vendeve.
Bisedimet mes dy liderëve pritet të përqendrohen kryesisht te marrëdhëniet ekonomike, tarifat doganore, siguria ndërkombëtare dhe mineralet strategjike, ndërsa Lula synon të rivendosë një raport më të qëndrueshëm me Uashingtonin pas një periudhe përplasjesh të forta politike dhe ekonomike.
Marrëdhëniet mes Brazilit dhe SHBA-së janë përkeqësuar ndjeshëm gjatë vitit të kaluar, pasi administrata Trump vendosi tarifa të larta deri në 50% mbi disa produkte braziliane. Ky vendim u justifikua nga Uashingtoni me pretendime për praktika të padrejta tregtare dhe me kritika të forta ndaj procesit gjyqësor ndaj ish-presidentit brazilian Jair Bolsonaro, i cili më vonë u dënua për përpjekje për të cenuar rendin demokratik në vend.
Më pas, një pjesë e këtyre tarifave u tërhoq, përfshirë ato që preknin eksportet kryesore si mishi i viçit dhe kafeja braziliane, me qëllim uljen e presionit mbi çmimet e ushqimeve në tregun amerikan. Megjithatë, një tarifë shtesë prej 10% vazhdon të jetë në fuqi dhe pritet të skadojë në korrik.
Situata është tensionuar sërish, pasi autoritetet braziliane paralajmërojnë se SHBA mund të jetë duke përgatitur një paketë të re tarifash në kuadër të një hetimi të njohur si “Seksioni 301”, i cili lidhet me praktikat e dyshuara të padrejta tregtare.
Sipas burimeve të përfshira në proces, takimet e fundit mes zyrtarëve të Departamentit të Tregtisë në SHBA dhe përfaqësuesve brazilianë kanë rritur shqetësimet në Brazil, pasi disa prej pyetjeve të ngritura janë interpretuar si sinjal se hetimi mund të përdoret për të justifikuar vendosjen e tarifave të reja.
Palët pritet të zhvillojnë diskutime intensive për të shmangur një përshkallëzim të mëtejshëm tregtar, në një moment kur marrëdhëniet ekonomike mes dy vendeve mbeten të brishta dhe me ndikim të drejtpërdrejtë në tregjet globale.
