Të paktën 10 persona janë vrarë dhe 76 të tjerë janë plagosur si pasojë e sulmeve me dronë dhe raketa nga Rusia në Ukrainë gjatë 24 orëve të fundit, sipas autoriteteve ukrainase.
Zyrtarët në pesë rajone të ndryshme raportuan viktima, ndërsa Moska vijon të godasë qytetet dhe fshatrat ukrainase me sulme të vazhdueshme ajrore. Situata mbetet kritike, me popullsinë civile që përballet çdo ditë me bombardime të rënda.
Ndërkohë, presidenti ukrainas Volodymyr Zelensky deklaroi se Ukraina ka ndërmarrë kundërsulme të forta, duke goditur tre cisterna ruse nafte, një anije luftarake që transporton raketa lundruese dhe një mjet patrullimi në dy porte ruse.
Sipas tij, cisternat ishin pjesë e të ashtuquajturës “flotë hije” të Rusisë, e përdorur për të shmangur sanksionet perëndimore të vendosura pas pushtimit të plotë të Ukrainës në vitin 2022.
Forcat ajrore ukrainase njoftuan se Rusia lëshoi 269 dronë gjatë natës, nga të cilët 249 u rrëzuan ose u bllokuan. Megjithatë, u konfirmuan 19 goditje direkte dhe një sulm me raketë balistike në 15 zona të ndryshme, si dhe dëme nga mbetjet e dronëve të rrëzuar.
Sipas autoriteteve, tre persona humbën jetën në rajonin e Khersonit, ndërsa nga dy viktima u raportuan në rajonet e Odesës, Donetskut dhe Zaporizhias, si dhe një viktimë në rajonin e Sumyt.
Nga ana tjetër, ushtria ruse deklaroi se Ukraina ka lëshuar të paktën 334 dronë drejt territorit rus, duke synuar veçanërisht rajonin veriperëndimor të Leningradit.
Në javët e fundit, Ukraina ka intensifikuar sulmet ndaj infrastrukturës ruse të naftës, duke goditur terminale eksporti dhe duke shkaktuar, sipas Kievit, dëme që kapin vlera miliarda dollarëshe.
Volodymyr Zelensky bëri të ditur se terminali i Primorskit në Detin Baltik është dëmtuar rëndë, ndërsa një cisternë dhe një anije patrullimi janë goditur. Ai shtoi se një tjetër anije luftarake e klasit “Karakurt”, e aftë të mbajë raketa “Kalibr”, ishte gjithashtu në shënjestër.
Më herët, lideri ukrainas deklaroi se dy cisterna të tjera nafte u goditën nga dronët ukrainas në hyrje të portit të Novorossiysk në Detin e Zi. “Këto cisterna përdoreshin për transport nafte. Tani nuk do të përdoren më,” shkroi ai.
Ndërkohë, Kremlini ka minimizuar ndikimin e këtyre sulmeve, por mbetet i shqetësuar për depërtimin e thellë të dronëve ukrainas në territorin rus.
Madje, Rusia ka njoftuar reduktimin e paradës ushtarake për Victory Day më 9 maj, duke përmendur si arsye “kërcënimin terrorist” nga Ukraina.
Lufta, tashmë më shumë se katër vite pas nisjes së pushtimit të plotë rus, po hyn në një fazë edhe më të ashpër, me të dyja palët që intensifikojnë goditjet dhe akuzojnë njëra-tjetrën për shënjestrim të civilëve.
