Kryeministri shqiptar Edi Rama ka deklaruar në një intervistë për Politico se Shqipëria do të ishte e gatshme të mbështeste Shtetet e Bashkuara në çdo përpjekje kundër Iranit, duke përfshirë edhe lejimin e operacioneve ushtarake nga territori shqiptar, në kushte të caktuara.
Ai theksoi se një angazhim i tillë do të ishte i mundur vetëm nëse SHBA do të siguronte mbrojtje ajrore për vendin, duke nënvizuar mungesën e këtyre kapaciteteve në Shqipëri.
Në të njëjtën intervistë, Rama kritikoi Bashkimin Evropian për mungesën e dialogut të drejtpërdrejtë me Rusinë lidhur me luftën në Ukrainë, duke e cilësuar këtë si një gabim strategjik që mund të dobësojë rolin e Evropës në një marrëveshje të ardhshme paqeje.
Ai u shpreh se komunikimi me Moskën duhet të mbetet i hapur, pavarësisht rrethanave, ndërsa shtoi se Shqipëria nuk ka varësi ekonomike apo energjetike nga Rusia, çka i jep më shumë liri në qëndrimet e saj.
Rama komentoi gjithashtu raportimet mbi një marrëveshje të mundshme për ishullin e Sazanit me Jared Kushner, duke sqaruar se nuk ka ende një marrëveshje të finalizuar, por vetëm negociata në vazhdim.
Në fund, ai përmendi edhe projektet inovative në qeverisje, përfshirë përdorimin e inteligjencës artificiale në administratë, duke treguar se një iniciativë e tillë është në zhvillim.
