Presidenti i SHBA-së, Donald Trump, ka shprehur shqetësim për situatën politike në Iran, duke deklaruar se vendi është i përfshirë në një paqartësi të brendshme mbi udhëheqjen dhe drejtimin e tij.
Në një postim në rrjetin e tij social Truth Social, Trump shkroi se “Irani e ka shumë të vështirë të kuptojë se kush është udhëheqësi i tij”, duke shtuar se brenda vendit ekziston një përplasje mes grupeve të linjës së ashpër dhe atyre që ai i quajti “moderatë”.
Sipas tij, kjo ndarje e brendshme ka krijuar një situatë kaotike politike, duke e bërë të vështirë arritjen e një qëndrimi të unifikuar në negociatat e mundshme për përfundimin e konfliktit.
Ndërkohë, sekretarja e shtypit e Shtëpisë së Bardhë, Karoline Leavitt, deklaroi se administrata amerikane beson se ka një kuptim të qartë mbi aktorët kryesorë që mund të nënshkruajnë një marrëveshje paqeje, por theksoi se SHBA kërkon një propozim të unifikuar nga pala iraniane.
Ajo shtoi gjithashtu se brenda strukturave iraniane dyshohet për përçarje mes ekipit negociator dhe Gardës Revolucionare Islamike, çka sipas Uashingtonit po ndikon në procesin diplomatik.
Në të njëjtin qëndrim publik, Trump pretendoi gjithashtu se Shtetet e Bashkuara kanë “kontroll të plotë” mbi Ngushticën e Hormuzit, një nga pikat më strategjike të transportit të naftës në botë. Ai paralajmëroi se asnjë anije nuk mund të kalojë pa miratimin amerikan, duke shtuar se situata do të mbetet e tillë deri në arritjen e një marrëveshjeje me Iranin.
