Eliminimi nga Liga e Kampionëve ka tronditur Real Madrid, duke vënë në pikëpyetje të ardhmen e stolit dhe duke shtuar presionin mbi trajnerin aktual Álvaro Arbeloa.
Një sezon që pritej të kurorëzohej me sukses në Europë është kthyer në një zhgënjim të madh për madrilenët, duke detyruar presidentin Florentino Pérez dhe drejtuesit e klubit të nisin analizën për një ndryshim të mundshëm në pankinë.
Sipas raportimeve të The Athletic, katër emra të njohur të futbollit botëror janë në listën e ngushtë për të marrë drejtimin e ekipit.
Jürgen Klopp konsiderohet si kandidati ideal për të nisur një cikël të ri, falë eksperiencës në rindërtimin e skuadrave dhe krijimin e një identiteti të fortë loje, megjithëse deri tani nuk ka pasur kontakte konkrete.
Një tjetër emër që vazhdon të ketë peshë është Zinedine Zidane, i cili ka histori suksesi me klubin madrilen. Megjithatë, planet e tij aktuale lidhen më shumë me drejtimin e kombëtares së Francës, çka e bën rikthimin në Madrid të pasigurt.
Në listë është edhe Didier Deschamps, i vlerësuar për autoritetin dhe aftësinë për të menaxhuar lojtarë të mëdhenj, si dhe Mauricio Pochettino, i njohur për fleksibilitetin taktik dhe zhvillimin e talenteve të rinj.
Problemet e Real Madridit këtë sezon nuk lidhen vetëm me eliminimin europian. Skuadra ka shfaqur mungesë stabiliteti, luhatje në formë dhe një ekuilibër të brishtë mes sulmit dhe mbrojtjes – faktorë që kanë shtyrë drejtuesit të mendojnë seriozisht për një epokë të re në “Santiago Bernabéu”.
