Barcelona ka nisur punën për ndërtimin e skuadrës së sezonit të ardhshëm, duke vendosur si prioritet përforcimin e repartit ofensiv me një sulmues të nivelit të lartë.
Pas luhatjeve në efikasitet gjatë këtij sezoni, drejtuesit katalanas po shqyrtojnë mundësinë e një investimi të madh në merkato, që mund të arrijë deri në 100 milionë euro për një “numër 9” të klasit botëror.
Në këtë proces po dëgjohet gjithnjë e më shumë edhe zëri i Lamine Yamal, një nga talentet më premtues të klubit, i cili tashmë ka një rol të rëndësishëm në projektin sportiv të Barcelonës. Sipas raportimeve, ai ka identifikuar profilin ideal të sulmuesit që i nevojitet skuadrës dhe partnerin e duhur në fazën ofensive.
Emri që pëlqehet më shumë nga Yamal është ai i Victor Osimhen, aktualisht pjesë e Galatasaray. Sulmuesi nigerian vlerësohet për forcën fizike, shpejtësinë në sulmin e hapësirave dhe instinktin e tij për gol, cilësi që do t’i përshtateshin stilit të lojës së Barcelonës.
Për një lojtar si Yamal, që spikat në aksionet individuale dhe krijimin e rasteve nga krahët, një sulmues me karakteristikat e Osimhen do të rriste ndjeshëm potencialin ofensiv të skuadrës.
Megjithatë, pengesa kryesore mbetet aspekti financiar. Osimhen është një nga sulmuesit më të kërkuar në treg dhe kartoni i tij pritet të kushtojë rreth, ose edhe mbi, 100 milionë euro – një shifër që Barcelona duhet ta menaxhojë me kujdes për të realizuar transferimin.
