E ardhmja e Robert Lewandowskit mbetet ende e hapur, ndërsa Barcelona nuk ka ndërmend të heqë dorë nga sulmuesi polak. Sipas raportimeve të “El Mundo Deportivo”, lojtari është informuar tashmë për ofertën e klubit katalanas, pas një takimi mes agjentit të tij dhe drejtuesve blaugrana.
Interesimi për 37-vjeçarin është rritur ndjeshëm në javët e fundit, me disa klube që kanë shfaqur gatishmëri për ta bindur të ndryshojë ambient. Në këtë situatë, agjenti i Lewandowskit ka kërkuar të kuptojë qartë planet e Barcelonës për sezonin e ardhshëm.
Presidenti Joan Laporta ka shprehur më herët dëshirën për të rinovuar kontratën me sulmuesin, por duke marrë parasysh moshën e tij dhe objektivat e klubit në merkato – ku prioritet mbeten një qendërsulmues i ri dhe një mbrojtës i majtë – oferta parashikon një zgjatje njëvjeçare me kushte ekonomike më të ulëta.
Përveç Barcelonës, në garë për shërbimet e Lewandowskit janë edhe klube si AC Milan, Juventus, Chicago Fire, si dhe disa ekipe nga kampionatet arabe.
Megjithatë, prioriteti i sulmuesit polak mbetet qëndrimi në Barcelonë, ku ai gëzon stabilitet familjar dhe një ambient të përshtatshëm jetese. Pavarësisht kësaj, konkurrenca e lartë dhe ofertat ekonomike mund të ndikojnë në vendimin final.
Lewandowski, i njohur për mentalitetin e tij konkurrues, është i hapur edhe për një rol të dytë në skuadër, për sa kohë që projekti sportiv mbetet ambicioz. Ai i ka vendosur vetes si afat fundin e muajit për të marrë një vendim përfundimtar mbi të ardhmen e tij, ndërsa gara për firmën e tij mbetet plotësisht e hapur.
