Shtëpia e Bardhë ka bërë të ditur se presidenti Donald Trump nuk ka dhënë ende miratimin për asnjë propozim armëpushimi me Iran, pavarësisht raportimeve të shumta për negociata në zhvillim.
Sipas burimeve të cituara nga Reuters, një plan i ndërmjetësuar nga Pakistani parashikon një armëpushim të menjëhershëm, të ndjekur nga një marrëveshje më afatgjatë. Ky propozim thuhet se u është paraqitur të dyja palëve, SHBA-së dhe Iranit.
Megjithatë, një zyrtar i lartë i Shtëpisë së Bardhë ka theksuar se këto janë vetëm ide në diskutim dhe nuk përfaqësojnë një vendim përfundimtar. Ai u shpreh se presidenti nuk e ka aprovuar një marrëveshje të tillë deri në këtë fazë.
Raportime të tjera mediatike kanë përmendur edhe një variant tjetër, që përfshin një armëpushim 45-ditor, i cili thuhet se ka dalë nga negociata më të thelluara mes palëve. Ndërkohë, propozimi fillestar i ndërmjetësuar nga Pakistani përfshin një periudhë më të shkurtër armëpushimi dhe një fazë negociatash prej 15 deri në 20 ditësh për arritjen e një marrëveshjeje më të gjerë.
Zhvillimet vijnë në një moment tensionesh të larta, ku SHBA ka vendosur kushte ndaj Iranit për rikthimin e lëvizjes së lirë në Ngushtica e Hormuzit. Presidenti Trump ka paralajmëruar më herët masa të ashpra, përfshirë goditjen e infrastrukturës strategjike, nëse këto kërkesa nuk plotësohen.
