Kryeministrja e Italisë, Giorgia Meloni, ka shprehur qëndrimin e saj kritik ndaj deklaratave të Donald Trump mbi të ardhmen e NATO-s dhe marrëdhëniet me aleatët europianë.
Në një intervistë për Rai, Meloni theksoi se Europa nuk përfiton nga një kurs i ndarë nga Shtetet e Bashkuara, duke nënvizuar rëndësinë e bashkëpunimit transatlantik. Megjithatë, ajo shtoi se vendet europiane duhet të jenë të gatshme të mbrojnë interesat e tyre kur ka mospërputhje.
“Kur nuk jemi dakord, duhet ta themi hapur. Dhe këtë herë nuk jemi dakord”, u shpreh ajo.
Paralelisht, Meloni bëri të ditur se po zhvillon vizita në vendet e Gjirit Persik, me fokus sigurimin e burimeve energjetike për Italinë. Ajo përmendi se një pjesë e konsiderueshme e furnizimit me naftë të vendit vjen nga kjo zonë, ndërsa më herët kishte diskutuar edhe për gazin natyror gjatë një vizite në Algjeri.
Në fund, kryeministrja italiane hodhi poshtë zërat për ndryshime në qeveri pas humbjes së referendumit për reformën në drejtësi, duke i cilësuar spekulimet si të pabazuara.
