Google ka ngritur alarmin për ndikimin që mund të kenë kompjuterët kuantik në sigurinë kibernetike, duke paralajmëruar se brenda pak vitesh këto teknologji mund të thyejnë sistemet aktuale të enkriptimit.
Sipas ekspertëve të kompanisë, rreth vitit 2029 mund të arrihet një moment kritik, i njohur si “Q Day”, kur kompjuterët kuantik do të kenë aftësinë të dekriptojnë kodet që sot mbrojnë të dhënat online. Edhe pse kjo teknologji është ende në zhvillim, përparimet e shpejta po rrisin shqetësimet për sigurinë globale të informacionit.
Zyrtarët e sigurisë në Google theksojnë se kërcënimi nuk lidhet vetëm me të dhënat e ardhshme, por edhe me ato që po krijohen sot, të cilat mund të ruhen dhe të deshifrohen në të ardhmen kur teknologjia të jetë më e avancuar.
Për këtë arsye, kompania bën thirrje për kalim sa më të shpejtë drejt kriptografisë “post-kuantike”, një gjeneratë e re algoritmesh e projektuar për t’i bërë ballë sulmeve nga kompjuterët kuantik.
Ky zhvillim konsiderohet një sfidë madhore për industrinë teknologjike dhe sigurinë kibernetike, duke treguar se përgatitja për epokën kuantike është tashmë një nevojë urgjente dhe jo më një skenar i largët.
