Lufta në Lindjen e Mesme ka hyrë në ditën e saj të 26-të, ndërsa përveç zhvillimeve ushtarake, po shtohen edhe lëvizjet diplomatike dhe ekonomike, përfshirë një rënie të ndjeshme të çmimeve të naftës në tregjet globale.
Presidenti amerikan Donald Trump ka deklaruar në mënyrë të përsëritur se negociatat me Iranin janë në zhvillim dhe se Teherani është i gatshëm për një marrëveshje. Megjithatë, këto pretendime janë hedhur poshtë nga autoritetet iraniane.
Zëdhënësi ushtarak iranian, Ebrahim Zolfaqari, reagoi me ironi, duke deklaruar se SHBA “po negocion me veten”, ndërsa theksoi se epoka e premtimeve amerikane ka përfunduar.
Nga ana tjetër, raportohet se Shtëpia e Bardhë i ka dërguar Teheranit një plan paqeje me 15 pika përmes Pakistanit, që po vepron si ndërmjetës. Ky plan përfshin çmontimin e kapaciteteve bërthamore të Iranit, ndalimin e mbështetjes për grupet militante si Hezbollahu dhe hapjen pa kushte të Ngushticës së Hormuzit. Në këmbim, parashikohet heqja e sanksioneve dhe mbështetje për një program civil bërthamor.
Ndërkohë, zhvillime konkrete janë vërejtur në terren, pasi Teherani ka njoftuar se Ngushtica e Hormuzit është e hapur për anijet “jo armiqësore”, kundrejt një tarife që, sipas raportimeve, mund të arrijë deri në 2 milionë dollarë. Disa cisterna nafte kanë rifilluar tashmë qarkullimin në këtë rrugë strategjike.
Paralelisht, Trump ka deklaruar se SHBA ka marrë një “dhuratë të madhe” në sektorin e energjisë dhe ka përsëritur qëndrimin e tij se lufta është fituar. Megjithatë, prania ushtarake amerikane në rajon pritet të rritet, pasi Pentagoni po përgatitet të dislokojë rreth 1,000 trupa nga Divizioni i 82-të Ajror, duke sinjalizuar se tensionet mbeten të larta.
