Partia Socialiste pritet të përballet me një valë të gjerë ndryshimesh në nivel vendor, ndërsa drejtuesit e saj paralajmërojnë një “rifreskim” të thellë të strukturave në shumicën e bashkive të vendit.
Kreu i grupit parlamentar të PS-së, Taulant Balla, deklaroi se sipas sondazheve të brendshme, nëse zgjedhjet do të mbaheshin këtë të diel, socialistët do të arrinin sërish fitore.
“PS i fiton zgjedhjet nëse mbahen sot, por ne nuk kemi kohë për të humbur. Do të ketë ndryshime në pjesën më të madhe të bashkive,” u shpreh ai, duke lënë të kuptohet për një ristrukturim të thellë të pushtetit vendor.
Sipas Ballës, procesi do të jetë konkurrues dhe synon të sjellë figura të reja në drejtimin lokal, ndërsa fokusi kryesor mbetet përmirësimi i administrimit dhe rritja e investimeve në territore të ndryshme.
Vëmendje e veçantë pritet t’i kushtohet disa bashkive kyçe, përfshirë Kavajë dhe Tiranë, ku sipas socialistëve ka nevojë për ndërhyrje më të forta dhe mbështetje më të madhe institucionale. Në kryeqytet, situata lidhet edhe me mungesën e kryebashkiakut Erion Veliaj, çka ka krijuar boshllëqe në menaxhim.
Ndërkohë, PS pritet të nisë përgatitjet për zgjedhjet vendore në vjeshtë, ku do të testojë mbështetjen në 61 bashki, në një garë që pritet të jetë vendimtare për forcimin e pushtetit lokal.
Ky paralajmërim për “furtunë” brenda së majtës vjen në një moment kyç politik, duke sinjalizuar ndryshime të thella dhe një strategji të re për të ruajtur dominimin në nivel vendor.
