Pas fitores së thellë 6-1 në Bergamo ndaj Atalanta, te Bayern kishte shqetësime për gjendjen e disa lojtarëve të dëmtuar. Megjithatë, trajneri bavarez, Vincent Kompany ka dhënë lajme më qetësuese, duke bërë të ditur se mungesat e Jonas Urbig, Alphonso Davies dhe Jamal Musiala pritet të zgjasin vetëm për një periudhë të shkurtër.
“Po e diskutojmë me mjekët dhe shpresojmë që Urbig të rikthehet diku javën e ardhshme,” tha Kompany. Meqenëse edhe Manuel Neuer nuk pritet të rikthehet deri pas ndeshjeve të kombëtareve, portieri Sven Ulreich pritet të jetë titullar në ndeshjen e së shtunës në Leverkusen.
Kompany theksoi besimin te përvoja e portierit 37-vjeçar, ndërsa drejtori sportiv Max Eberl vlerësoi profesionalizmin e tij dhe gatishmërinë për të ndihmuar skuadrën sa herë që është kërkuar.
Sa i përket dëmtimeve, Davies ka pësuar një tërheqje në kofshë dhe nuk do të udhëtojë me kombëtaren, ndërsa rikthimi i tij pritet pas ndeshjeve ndërkombëtare. Ndërkohë, këmba e operuar e Musiala ka reaguar negativisht dhe ai mund të rikthehet në stërvitje në fillim të javës së ardhshme.
Kompany la të hapur edhe mundësinë e aktivizimit të Harry Kane, i cili qëndroi në stol në ndeshjen në Bergamo për shkak të një problemi në pulpë. “Nëse marrim sinjalin se mund të luajë, atëherë ai do të luajë,” u shpreh trajneri.
Bayern Munich, ende i pamposhtur në ndeshjet jashtë fushe këtë sezon, synon të marrë një tjetër rezultat pozitiv në transfertën ndaj Bayer Leverkusen. Kompany theksoi se barazimi 1-1 i Leverkusen ndaj Arsenal tregon se kundërshtari është i fortë dhe se ndeshja nuk do të jetë aspak e lehtë.
