Ekspertët e sigurisë kibernetike kanë zbuluar një mjet të ri hakerimi që mund të marrë kontrollin e pajisjeve iPhone në mënyrë të fshehtë.
Spyware-i, i quajtur “Coruna”, u identifikua nga studiuesit e Google Threat Intelligence Group, të cilët publikuan gjetjet e tyre pas një hetimi mbi aktivitetin e këtij mjeti.
Sipas raportit, programi keqdashës mund të shfrytëzojë dobësi në sistemin operativ iOS në pajisje të prodhuara nga viti 2019 deri në fund të vitit 2023. Studiuesit kanë monitoruar këtë mjet që nga viti 2025, ndërsa kompania e sigurisë iVerify spekulon se ai mund të ketë qenë fillimisht një mjet survejimi i zhvilluar për përdorim qeveritar, i cili më pas ka rrjedhur.
Paketa e “Coruna” përfshin më shumë se 20 dobësi sigurie që mund të shfrytëzohen për të depërtuar në pajisjet Apple dhe për të anashkaluar mbrojtjet e brendshme të sistemit.
Sulmi lidhet pjesërisht me shfletuesin Safari dhe mund të aktivizohet kur përdoruesi hap një lidhje të dëmshme. Pasi aktivizohet, spyware-i mund të marrë informacione nga pajisja, përfshirë mesazhe, fotografi, shënime dhe të dhëna financiare të ruajtura në telefon.
Sipas raportimeve të PCMag, mjeti është përdorur edhe në operacione spiunazhi kibernetik. Në korrik 2025, një grup hakerash rusë e përdori për të sulmuar faqe ukrainase, ndërsa hakerë të lidhur me Kinën dyshohet se e shpërndanë përmes platformave të rreme të kriptomonedhave.
Ekspertët paralajmërojnë se kërcënimet ndaj pajisjeve mobile po bëhen gjithnjë e më të sofistikuara. Megjithatë, përdoruesit mund të mbrohen duke përditësuar pajisjet e tyre me versionet më të fundit të iOS, ku dobësitë e shfrytëzuara nga ky sulm janë korrigjuar.
Studiuesit rekomandojnë gjithashtu aktivizimin e funksionit të sigurisë Lockdown Mode për përdoruesit që mund të jenë më të rrezikuar nga sulme të avancuara kibernetike.
