Qiproja është përfshirë në tensionet e fundit gjeopolitike në Lindjen e Mesme, pas përshkallëzimit të konfliktit mes Iranit, Izraelit dhe Shteteve të Bashkuara. Situata u bë më serioze pasi një dron iranian goditi bazën ajrore britanike në Akrotiri, duke shkaktuar evakuime dhe rritje të masave të sigurisë në ishull.
Pas incidentit, Greqia reagoi menjëherë duke dërguar forca ushtarake për të forcuar mbrojtjen e Qipros. Në zonë mbërritën fregatat “Kimon” dhe “Psara”, të pajisura me sisteme moderne kundërajrore dhe teknologji të avancuara mbikëqyrjeje. Gjithashtu, Athina vendosi në bazën ajrore “Andreas Papandreu” në Pafos katër avionë luftarakë F-16 Viper për të rritur mbrojtjen ajrore të ishullit.
Edhe Mbretëria e Bashkuar ka ndërmarrë masa për të përforcuar praninë ushtarake në rajon. Kryeministri Keir Starmer njoftoi se helikopterë të tipit Wildcat dhe shkatërruesi HMS Dragon do të dërgohen për të mbështetur operacionet detare dhe për të përballuar kërcënimet ajrore.
Ndërkohë, Franca ka dërguar një fregatë shumë-misionëshe dhe sisteme mbrojtëse kundër raketave dhe dronëve për të ndihmuar në mbrojtjen e ishullit. Edhe Spanja pritet të dërgojë fregatën “Christopher Columbus” në Mesdheun Lindor, e cila do të kryejë misione të mbrojtjes detare dhe kundërajrore, si dhe operacione për evakuimin e civilëve në rast nevoje.
Në ditët në vijim, edhe Italia dhe Holanda pritet të kontribuojnë me njësi detare për të mbështetur sigurinë e Qipros. Sipas ministrit italian të Mbrojtjes, Guido Crosetto, këto veprime lidhen edhe me detyrimet e ndërsjella të mbrojtjes që parashikon Bashkimi Europian për vendet anëtare në rast kërcënimi.
