Sekretari amerikan i Mbrojtjes, Pete Hegseth, njoftoi vendosjen e forcave shtesë ushtarake në Lindjen e Mesme, duke deklaruar se Shtetet e Bashkuara të Amerikës do të vijojnë operacionet kundër Iran dhe do të marrin “gjithë kohën e nevojshme” për të siguruar fitoren.
Në një konferencë për shtyp, Hegseth theksoi se SHBA-të nuk po veprojnë me nxitim, por do të zgjedhin momentin e duhur për të garantuar suksesin e plotë ushtarak. Ai citoi edhe qëndrimin e presidentit Donald Trump, duke përsëritur se strategjia amerikane nuk do të diktohet nga presioni kohor.
Duke iu referuar zhvillimeve të ditëve të fundit, Hegseth i cilësoi rezultatet si “historike” dhe “të pabesueshme”, ndërsa deklaroi se, sipas tij, “Irani ka mbaruar dhe e di këtë”. Ai shtoi se forcat amerikane kanë nisur të “godasin, çmontojnë dhe shkatërrojnë” kapacitetet ushtarake të Teheranit.
Sipas tij, udhëheqja iraniane do të përballet me fuqinë ajrore të SHBA-së dhe të Izrael deri në momentin që dy vendet të vendosin se operacionet kanë arritur objektivat e tyre.
“Po vijnë valë gjithnjë e më të mëdha, ne sapo kemi filluar”, u shpreh ai, duke shtuar se konflikti “nuk është projektuar kurrë si një luftë e drejtë”, pasi SHBA-të po e godasin Iranin në kushte disavantazhi për këtë të fundit.
Hegseth deklaroi gjithashtu se në Oqeanin Indian është fundosur një anije luftarake iraniane, e cila, sipas tij, besohej se ishte e sigurt në ujërat ndërkombëtare. Ai nuk e përmendi emrin e anijes.
Ndërkohë, autoritetet detare në Sri Lanka raportuan më herët se fregata iraniane IRIS Dena është fundosur në Oqeanin Indian, ndërsa rreth 140 persona që ndodheshin në bord rezultojnë të zhdukur.
