Të paktën 12 avionë luftarakë amerikanë F-22 kanë zbarkuar në një bazë ajrore izraelite në jug të vendit, në një kohë kur tensionet mes SHBA-së dhe Iranit vijojnë të rriten.
Sipas transmetuesit publik izraelit KAN, dislokimi i avionëve është pjesë e pranisë së shtuar ushtarake amerikane në Lindjen e Mesme. F-22 konsiderohen ndër avionët më të avancuar luftarakë në botë dhe zotërohen ekskluzivisht nga Shtetet e Bashkuara.
Këta avionë janë të projektuar për misione depërtimi në territor armik, neutralizim të sistemeve të mbrojtjes ajrore dhe shkatërrim të instalimeve të radarëve, duke ofruar epërsi ajrore në zona me mbrojtje të fortifikuar.
Uashingtoni ka rritur praninë e tij ushtarake në rajonin e Gjirit Persik, ndërsa Presidenti Donald Trump ka paralajmëruar për mundësinë e veprimeve ushtarake ndaj Teheranit, në rast se dështojnë negociatat aktuale mbi programin bërthamor iranian.
Dislokimi i F-22 në Izrael shihet si një sinjal i fortë strategjik në një moment të ndjeshëm për sigurinë rajonale.
