Ish-kryeministri i Norvegjisë, Thorbjørn Jagland, është shtruar në spital pas një tentative për vetëvrasje, ndërsa ndaj tij rëndojnë akuza për korrupsion në lidhje me raportet e pretenduara me financierin e dënuar për abuzim seksual, Jeffrey Epstein.
Sipas raportimeve lokale, gjendja shëndetësore e Jagland paraqitet e rëndë. Mediat norvegjeze bëjnë me dije se më 17 shkurt, Shoqata e Redaktorëve Norvegjezë dhe disa redaktorë kishin arritur një marrëveshje me avokatin e tij për të mos e publikuar incidentin.
Akuzat ndaj Jagland u ngritën pasi Council of Europe i hoqi imunitetin diplomatik, që ai gëzonte gjatë kohës kur shërbeu si Sekretar i Përgjithshëm i institucionit (2009–2019). Sipas një raporti të BBC, hetimet nisën pas kërkesës së Økokrim, njësisë norvegjeze kundër krimit ekonomik, për të shqyrtuar dyshimet për korrupsion në periudhën 2011–2018.
Burime nga dosjet e publikuara në SHBA pretendojnë se Jagland kishte planifikuar vizita private dhe familjare në rezidencat e Epstein në Paris, New York dhe Palm Beach. Po ashtu, thuhet se Epstein kishte mbuluar shpenzime udhëtimi për Jagland dhe familjen e tij. Një udhëtim i planifikuar në ishullin privat të Epstein në Karaibe në vitin 2014 raportohet se u anulua.
Në dokumente përmendet gjithashtu se Jagland dyshohet t’i ketë kërkuar ndihmë Epstein për sigurimin e një kredie bankare, megjithëse nuk është e qartë nëse kjo është realizuar. Avokatët e ish-zyrtarit kanë deklaruar se ai mohon çdo përgjegjësi penale dhe është i gatshëm të bashkëpunojë me hetimin.
Jagland ka mbajtur disa poste të larta shtetërore, përfshirë atë të kryeministrit të Norvegjisë (1996–1997) dhe kryetar i Komitetit Norvegjez të Çmimit Nobel.
Ndërkohë, në Norvegji janë përmendur edhe figura të tjera publike në lidhje me dosjet e Epstein, përfshirë Princeshën e Kurorës Mette-Marit, diplomatët Mona Juul dhe Terje Rød-Larsen, si dhe drejtorin e Forumit Ekonomik Botëror, Børge Brende.
