Kryeministrja italiane, Giorgia Meloni, njoftoi se Italia do të marrë pjesë në Bordin e Paqes, por vetëm si vend vëzhgues, duke kapërcyer shqetësimet kushtetuese që kishte përmendur tre javë më parë, raportojnë mediat italiane.
“Ne u ftuam si vend vëzhgues dhe kjo është një zgjidhje e mirë për çështjet kushtetuese që lidhen me pjesëmarrjen në Bord,” tha Meloni për gazetarët. Ajo shtoi se Italia do t’i përgjigjet pozitivisht ftesës, edhe pse niveli i pjesëmarrjes duhet të përcaktohet ende, pasi ftesa mbërriti vetëm dje.
Sipas kryeministres, pas gjithë përpjekjeve të bëra nga Italia për stabilizimin e Lindjes së Mesme, një prani italiane dhe evropiane është e domosdoshme.
Takimi i parë zyrtar i Bordit të Paqes do të zhvillohet më 19 shkurt në Uashington, me pjesëmarrjen e të paktën njëzet vendeve. Donald Trump pritet të njoftojë një plan rindërtimi me vlerë disa miliardë dollarë për Rripin e Gazës.
