Rënia e ndjeshme e Bitcoin ka shtuar ndjeshëm frikën mes investitorëve të kriptomonedhave, duke tronditur tregjet globale dixhitale. Që nga fillimi i vitit, vlera e kriptomonedhës më të madhe në botë ka pësuar një rënie prej rreth 28%, ndërsa shqetësimi po rritet se çmimi mund të bjerë edhe nën pragun 63.295 dollarë, për shkak të presionit të lartë të shitjeve.
Pasiguria politike dhe debatet mbi politikën monetare të Shteteve të Bashkuara konsiderohen ndër faktorët kryesorë që kanë shtuar nervozizmin e investitorëve dhe luhatjet në tregje. Në të njëjtën kohë, dobësimi i aksioneve të teknologjisë dhe paqëndrueshmëria në tregjet e floririt dhe metaleve të tjera kanë ndikuar negativisht edhe në sektorin e kriptomonedhave.
Ekspertët paralajmërojnë se paqëndrueshmëria pritet të vazhdojë edhe në muajt në vijim. Rënia aktuale e çmimit e ka çuar Bitcoin në nivelet më të ulëta të 16 muajve të fundit, pavarësisht mbështetjes publike që presidenti amerikan Donald Trump ka shprehur për kriptomonedhat dhe premtimeve për lehtësim rregullator. Vetëm në tetor 2025, Bitcoin kishte arritur një rekord historik prej 122.200 dollarësh.
“Investitorët që kanë marrë më shumë rrezik sesa duhet, që kanë përdorur hua të mëdha ose kanë besuar se çmimet vetëm rriten, tani po përballen me realitetin e paqëndrueshmërisë së tregut,” u shpreh për Reuters ekonomisti Joshua Chu.
Bitcoin mbetet kriptomonedha më e madhe dhe më e njohur globalisht, një formë paraje dixhitale që funksionon pa kontrollin e një institucioni financiar qendror. Ndër veprimet e para të Trump pas rikthimit në Shtëpinë e Bardhë në janar 2025 ishte edhe një urdhër ekzekutiv për ta bërë SHBA-në “kryeqytetin botëror të kriptomonedhave”.
