Bisedimet për t’i dhënë fund luftës në Ukrainë kanë hyrë në ditën e dytë të negociatave në Abu Dhabi, ku delegacionet e Ukrainës dhe Rusisë po zhvillojnë takime nën ndërmjetësimin e Shteteve të Bashkuara.
Kreu i delegacionit ukrainas, Rustem Umerov, konfirmoi nisjen e raundit të ri të diskutimeve, duke theksuar se procesi po vazhdon me konsultime trepalëshe, punë në grupe dhe përpjekje për të afruar qëndrimet mes palëve. Sipas tij, struktura e negociatave mbetet e njëjtë me atë të ditës së parë, me fokus në koordinimin e pozicioneve dhe avancimin e dialogut.
Nga ana tjetër, i dërguari i Presidentit rus Vladimir Putin, Kirill Dmitriev, deklaroi se ka shenja konkrete përparimi dhe se procesi po ecën në drejtim pozitiv drejt një marrëveshjeje të mundshme paqeje. Ai theksoi se, pavarësisht përpjekjeve për ta minuar procesin, dialogu po jep rezultate.
Dmitriev akuzoi gjithashtu disa aktorë evropianë dhe britanikë si “luftëdhënës” që, sipas tij, po përpiqen të ndërhyjnë dhe të pengojnë arritjen e një marrëveshjeje. “Sa më shumë përpiqen ta prishin procesin, aq më i dukshëm bëhet përparimi”, u shpreh ai.
Takimet në Abu Dhabi po zhvillohen në një moment kritik, teksa lufta në Ukrainë po afrohet drejt vitit të katërt, ndërsa presioni ndërkombëtar për një zgjidhje diplomatike vazhdon të rritet.
