Kryediplomati iranian, Abbas Araghchi, mbërriti në Stamboll për një vizitë të rëndësishme diplomatike, ku Turqia pritet të luajë rol ndërmjetësues në përpjekjet për uljen e tensioneve mes Teheranit dhe Uashingtonit. Vizita vjen në një moment delikat, ndërsa Shtetet e Bashkuara kanë pezulluar deri tani çdo veprim ushtarak ndaj Iranit.
Gjatë qëndrimit në Turqi, Araghchi pritet të takohet me ministrin e Jashtëm turk, Hakan Fidan, si dhe me presidentin Recep Tayyip Erdogan, në kuadër të përpjekjeve për të hapur një kanal diplomatik mes palëve.
Zyrtari i lartë iranian deklaroi se Teherani është i gatshëm për rifillimin e bisedimeve me SHBA-në, por theksoi se dialogu duhet të jetë i drejtë dhe nuk duhet të prekë aftësitë mbrojtëse të Iranit.
Nga ana tjetër, presidenti amerikan Donald Trump ka bërë të ditur se planifikon kontakte me Iranin, edhe pse SHBA-të kanë forcuar praninë ushtarake në Lindjen e Mesme duke dërguar një tjetër anije luftarake. Shefi i Pentagonit ka deklaruar se ushtria amerikane është e gatshme të zbatojë çdo vendim të presidentit.
Sipas burimeve iraniane, një nga kërkesat kryesore të Uashingtonit për rikthimin në tryezën e negociatave është kufizimi i programit iranian të raketave — një pikë që mbetet thelbësore dhe e ndjeshme për Teheranin.
