Vendet anëtare të Bashkimit Evropian mblidhen sot në Bruksel për të përcaktuar qëndrimin e përbashkët ndaj Shteteve të Bashkuara, në një moment delikat për marrëdhëniet transatlantike. Vendimi vjen një ditë pasi presidenti amerikan njoftoi tërheqjen e tarifave ndaj tetë vendeve evropiane, të lidhura me çështjen e Groenlandës, pas takimit me sekretarin e përgjithshëm të NATO-s, Mark Rutte.
Megjithatë, udhëheqësit evropianë pritet të analizojnë më gjerësisht linjën politike të Uashingtonit dhe atë që konsiderohet si një “marrëveshje e ardhshme” mes Trump dhe Rutte. Në Bruksel, fjalimi i Trump në Davos u prit me një farë lehtësimi, pasi ai deklaroi se nuk do të kërkonte aneksimin e Groenlandës me forcë dhe u shpreh i hapur për negociata.
Pavarësisht kësaj, deklaratat e presidentit amerikan krijuan pasiguri për lëshimet që mund të kërkohen në këmbim të këtyre negociatave. Diplomacia evropiane e vlerësoi pozitivisht faktin që Trump hoqi dorë nga kërcënimi i përdorimit të forcës ushtarake, një opsion që deri më tani nuk ishte përjashtuar qartë.
Në të njëjtën kohë, disa liderë të vendeve anëtare i kanë dërguar mesazhe paralajmëruese Uashingtonit, përpara fjalimit të Trump në Davos mbi Groenlandën, tarifat e reja dhe idenë e tij për krijimin e një “Këshilli të Paqes” për Gazën, një iniciativë që shihet si e diskutueshme dhe potencialisht konkurruese me rolin e OKB-së.
Të gjitha këto zhvillime do të jenë në fokus të samitit të jashtëzakonshëm të BE-së, i cili konsiderohet vendimtar për orientimin e ardhshëm të bllokut. Presidentja e Komisionit Evropian theksoi para Parlamentit Evropian se Europa ndodhet në një moment kyç, duke nënvizuar se, ndonëse BE preferon dialogun dhe zgjidhjet diplomatike, ajo është e përgatitur të veprojë me unitet, shpejtësi dhe vendosmëri nëse situata e kërkon.
