Në veçanti, Albin Kurti falenderon emigrantët për votën e tyre ndërsa thekson se iu është mirënjohës të gjithëve për kontributin e pamatshëm për liri, shtet dhe komb.
Sakaq, Albin Kurti thotë në fund të postimit të tij se puna do të vazhdojë, siguria e begatia do të shtohen dhe uron që t’iu prijë e mbara të gjithëve.
Statusi i plotë i Albin Kurtit
Mirëdita të dashur qytetarë,
Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht.
Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj.
Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike.
Puna vazhdon, siguria e begatia do të shtohen. Na priftë e mbara!
