Presidenti i Kolumbisë, Gustavo Petro, deklaroi se ushtria kolumbiane duhet të ndërpresë komunikimet me agjencitë e sigurisë amerikane derisa SHBA-ja të ndalojë sulmet ndaj anijeve të shpejta që dyshohen se transportojnë drogë.
Presidenti Petro urdhëroi forcat e sigurisë të vendit të tij të ndalin ndarjen e informacionit të inteligjencës me Shtetet e Bashkuara, derisa administrata Trump të ndalojë sulmet kundër personave të dyshuar për trafik droge në Karaibe.
Në një mesazh në platformën X, Petro shkroi se ushtria e Kolumbisë duhet “menjëherë të ndërpresë komunikimet dhe marrëveshjet e tjera me agjencitë e sigurisë amerikane”, ndërsa marrëdhëniet mes dy vendeve dikur aleatë të ngushtë në luftën kundër trafikut të drogës po përkeqësohen.
Kritikët i kanë krahasuar sulmet e SHBA-së ndaj anijeve të dyshuara për transport droge me ekzekutime jashtëgjyqësore. Petro shkroi se “lufta kundër drogës duhet t’i nënshtrohet të drejtave të njeriut të popujve të Karaibeve.” Nuk është ende e qartë se çfarë lloj informacioni Kolumbia do të ndalojë së ndari me Shtetet e Bashkuara. Shtëpia e Bardhë nuk dha një reagim të menjëhershëm ndaj deklaratave të fundit të Petros.
Sipas të dhënave të ofruara nga administrata Trump, të paktën 75 persona janë vrarë nga ushtria amerikane në sulme në ujërat ndërkombëtare që nga muaji gusht. Sulmet nisën në Karaibet jugore, pranë brigjeve të Venezuelës, por kohët e fundit janë zhvendosur në Paqësorin lindor, ku SHBA ka goditur anije pranë Meksikës.
Petro ka kërkuar që presidenti amerikan Donald Trump të hetohet për krime lufte lidhur me këto sulme, të cilat kanë prekur qytetarë nga Venezuela, Ekuadori, Kolumbia dhe Trinidad e Tobago.
Petro: u vranë civilë
Lideri i majtë ka qenë prej kohësh kritik ndaj politikës amerikane për drogën dhe ka akuzuar administratën Trump se ndëshkon fshatarët që kultivojnë kokën përbërësin bazë të kokainës në vend që të synojë trafikantët kryesorë dhe pastruesit e parave.
Të dielën, Petro tha se ishte takuar me familjen e një peshkatari kolumbian, i cili dyshohet se u vra gjatë një prej këtyre sulmeve.
“Ai mund të ketë qenë duke mbajtur peshk, ose mund të ketë qenë duke mbajtur kokainë, por nuk ishte dënuar me vdekje,” tha Petro gjatë një samiti mes udhëheqësve të Amerikës Latine dhe Bashkimit Evropian, që u mbajt në Kolumbi të dielën.
“Nuk kishte nevojë ta vrisnin.”
Administrata Trump e ka akuzuar Petron se është i butë ndaj trafikantëve dhe e ka kritikuar për vendimin për të mos ekstraduar drejt SHBA-së disa ish-udhëheqës rebelë kolumbianë të përfshirë në tregtinë e drogës.
Në tetor, administrata vendosi sanksione financiare ndaj Petros dhe anëtarëve të familjes së tij, duke i akuzuar për përfshirje në tregtinë globale të drogës.
Petro “ka lejuar që kartelat e drogës të lulëzojnë dhe ka refuzuar të ndalojë këtë aktivitet,” tha Sekretari i Thesarit, Scott Bessent, në një deklaratë pas vendosjes së sanksioneve më 24 tetor. “Presidenti Trump po ndërmerr veprime të forta për të mbrojtur kombin tonë dhe për të bërë të qartë se ne nuk do të tolerojmë trafikun e drogës drejt vendit tonë.”
SHBA rrit praninë detare
Tensionet e shtuara midis Shteteve të Bashkuara dhe Kolumbisë po ndodhin ndërsa SHBA po rrit praninë e saj detare në Karaibet jugore, me tetë anije luftarake, një nëndetëse, avionë luftarakë dhe marinsa të dislokuar në rajon.
Qeveria e Venezuelës e ka përshkruar këtë grumbullim detar si një kërcënim ndaj sovranitetit të saj, me zyrtarë të atij vendi që thonë se ushtria amerikane po përgatitet të ndërmarrë sulme ndaj qeverisë së goditur të Nicolás Maduro-s.
Administrata Trump ka thënë se dislokimi ka për qëllim frenimin e trafikut të drogës, megjithatë Trump ka lënë të kuptohet se mund të ketë edhe sulme ndaj objektivave brenda Venezuelës, lideri i së cilës është përshkruar nga zyrtarë në Uashington si kreu i një karteli droge.
Ministri i Mbrojtjes së Venezuelës, Vladimir Padrino López, njoftoi të martën se personeli ushtarak, anëtarët e një milicie civile, oficerë policie dhe organizatorë të partisë në pushtet do të mobilizohen për një stërvitje trajnimi me qëllim mbrojtjen e hapësirës ajrore të vendit.
Ai i bëri komentet e tij, të transmetuara në televizionin shtetëror, duke qëndruar pranë një sistemi raketash tokë-ajër në një bazë ushtarake në kryeqytet, Caracas, por nuk u panë aktivitete stërvitore diku tjetër në qytet.
