Napoli përballet me një tronditje të madhe në prag të sezonit të ri pas dëmtimit të rëndë të Romelu Lukakut. Mungesa e tij për të paktën katër muaj detyron klubin të ndryshojë planet dhe të rikthehet menjëherë në merkato për të gjetur një zëvendësues.
Momente delikate për Napolin, që sapo ka marrë një goditje të fortë për nisjen e sezonit. Romelu Lukaku, sulmuesi i afruar për të udhëhequr repartin ofensiv, do të mungojë për të paktën katër muaj për shkak të një dëmtimi serioz, duke humbur të gjithë pjesën e parë të kampionatit.
Kjo situatë i ka prishur planet e trajnerit Antonio Conte, i cili prej javësh kishte theksuar domosdoshmërinë e afrimeve të reja për ta forcuar skuadrën.
Conte kishte vlerësuar potencialin e Lorenzo Luccas, por kishte theksuar se sulmuesi i ri është ende i papjekur për të mbajtur peshën e një titullari në ndeshjet më të rëndësishme. “Ai duhet të mësojë nga Lukaku,” kishte thënë trajneri, por tani, me mungesën e belgut, Lucca rrezikon të mbetet pa mentorin që pritej ta udhëhiqte në rrugën e rritjes.
Drejtori sportiv Giovanni Manna ka reaguar menjëherë dhe ka hartuar një listë alternativash për zëvendësimin e Lukakut. Emri i parë është ai i Joshua Zirkzee, ish-sulmuesi i Bolognës, i cili pas një sezoni zhgënjyes te Manchester United duket se nuk bën më pjesë në planet e trajnerit Amorim. Holandezi, i mbajtur në stol për 90 minuta në humbjen ndaj Arsenalit, shihet si një përforcim i arritshëm dhe i gatshëm për rikthim në Serie A.
Për vetë lojtarin, një kalim te Napoli do të ishte mundësi ideale për t’u ringjallur dhe për të luajtur në Champions League. Për klubin italian, do të ishte gjithashtu një zgjidhje e shpejtë për të mbushur boshllëkun e krijuar nga mungesa e Lukakut. Bisedimet pritet të nisin së shpejti, ndërsa merkato e Napolit hyn tashmë në një fazë të nxehtë dhe vendimtare.
