I dërguari special i SHBA-së, Steve Witkoff, do të vizitojë sot Gazën për të inspektuar vendet e shpërndarjes së ushqimit. Sekretarja e Shtypit e Shtëpisë së Bardhë, Karoline Leavitt tha se Witkoff do të vizitojë territorin së bashku me ambasadorin e SHBA-së në Izrael, Mike Huckabee, dhe do të sigurojë një plan për të shpërndarë më shumë ushqim dhe do të takohet me banorët vendas të Gazës për të dëgjuar nga afër për këtë situatë të tmerrshme në terren.
Një drejtor spitali i tha BBC-së se më shumë se 50 palestinezë u vranë dhe 400 të tjerë u plagosën ndërsa prisnin ushqim pranë një kalimi në veri të Gazës të mërkurën. Pamjet filmike treguan viktimat nga incidenti pranë pikës kalimtare Zikim duke u transportuar me karroca në spitalin al-Shifa në qytetin e Gazës.
Agjencia e Mbrojtjes Civile e Gazës, e drejtuar nga Hamasi, tha se forcat izraelite qëlluan mbi turmat e mbledhura rreth kamionëve me ndihma. Ushtria izraelite tha se trupat qëlluan “të shtëna paralajmëruese”, por se “nuk ishte në dijeni të ndonjë viktime”.
Zyrtarët izraelitë kanë kërcënuar se nëse nuk ka përparim në ditët në vijim për një armëpushim dhe marrëveshje për lirimin e pengjeve, atëherë ata mund të ndërmarrin hapa të rinj ndëshkues kundër Hamasit. Mediat izraelite raportuan se ato mund të përfshijnë aneksimin e pjesëve të Gazës. Menjëherë pas mbërritjes së të dërguarit të tij në Izrael, Presidenti i SHBA-së Donald Trump shkroi në rrjetet sociale:“Mënyra më e shpejtë për t’i dhënë fund krizës humanitare në Gaza është që Hamasi të DORËZOHET DHE të lërë të LIRË PENGJET!!!”
Witkoff do të vizitojë Gazën një ditë pas takimit të tij me Netanyahun, ku ata u përqendruan në “diskutime” të tilla si ushqimi dhe ndihma në Gaza, tha Leavitt. Njoftimi vjen pas raportimeve se ai do të vizitojë vendet e shpërndarjes së ushqimit të drejtuara nga Fondacioni Humanitar i Gazës (GHF) i mbështetur nga SHBA-të dhe Izraeli.
Në Gaza, ministria e shëndetësisë tha të enjten se 111 persona ishin vrarë dhe 820 të tjerë ishin plagosur nga ofensiva ushtarake e Izraelit në 24 orët e fundit. Në një deklaratë të veçantë, ministria tha se dy persona kishin vdekur nga kequshqyerja gjatë ditës së kaluar, duke e çuar numrin e përgjithshëm të vdekjeve nga kequshqyerja që nga fillimi i luftës në 159, përfshirë 90 fëmijë.
Të martën, ekspertët globalë të sigurisë ushqimore të mbështetur nga OKB-ja paralajmëruan se “skenari më i keq i urisë” po “shfaqej aktualisht” midis popullsisë prej 2.1 milionë banorësh. Agjencitë e OKB-së kanë thënë se në Gaza ka uri masive të shkaktuar nga njeriu dhe kanë fajësuar Izraelin, i cili kontrollon hyrjen e të gjitha furnizimeve në Gaza. Por Izraeli ka këmbëngulur se nuk ka kufizime në shpërndarjen e ndihmave dhe se “nuk ka uri”.
Pavarësisht kësaj, katër ditë më parë ajo zbatoi masa që, sipas saj, synojnë të ndihmojnë OKB-në dhe partnerët e saj të mbledhin ndihma nga kalimet kufitare dhe ta shpërndajnë atë brenda Gazës, duke përfshirë “pauza taktike” të përditshme në operacionet ushtarake në tre zona dhe krijimin e asaj që ajo e quan “korridore të caktuara humanitare”.
Forcat Mbrojtëse të Izraelit (IDF) thanë të enjten se 43 pako ndihmash që përmbanin ushqime për banorët në Gazën jugore dhe veriore ishin hedhur nga ajri dhe “do të vazhdojnë të punojnë për të përmirësuar reagimin humanitar në Rripin e Gazës, së bashku me bashkësinë ndërkombëtare”.
Zyra humanitare e OKB-së ka thënë se pauzat taktike nuk lejojnë rrjedhën e vazhdueshme të furnizimeve të nevojshme për të përmbushur nevojat e mëdha të popullsisë dhe se turmat e uritura vazhdojnë të shkarkojnë furnizimet nga kamionët ndërsa kalojnë nëpër kalimet izraelite.
