Izraeli do të fillojë një tjetër pauzë 10 orëshe në aktivitetin ushtarak në disa pjesë të Gazës për të lejuar shpërndarjen e ndihmave.
Aktiviteti ushtarak do të ndërpritet nga ora 10:00 deri në orën 20:00 në tre zona të populluara të Gazës, zona El-Mawasi, Deir al-Balah qendror dhe qyteti verior i Gazës, për t’i lejuar OKB-së dhe organizatave të tjera të shpërndajnë ushqim dhe ilaçe njerëzve “deri në njoftim të mëtejshëm”.
Pauza vjen pasi agjencitë e ndihmës paralajmëruan për uri masive në të gjithë Gazën.
Të dielën, Organizata Botërore e Shëndetësisë tha se kequshqyerja kishte arritur “nivele alarmante”.
OKB-ja e mirëpriti pauzën, e cila tha se përfshinte “heqjen e barrierave doganore” për ndihmën nga Egjipti.
