Fjalimi që Vladimir Putin mbajti pak pas orës 10 të mëngjesit sot zgjati vetëm 10 minuta para trupave ruse dhe udhëheqësve të njëzet vendeve që u mblodhën në Sheshin e Kuq të Moskës për të përkujtuar 80-vjetorin e fitores ndaj Gjermanisë naziste, një përvjetor që festohet për të katërtin vit radhazi në hijen e luftës Rusi-Ukrainë.
“Në Rusi, Dita e Fitores festohet si festa më e rëndësishme”, tha Putini, duke theksuar se vendi i tij i mban mend mësimet e Luftës së Dytë Botërore dhe se nuk do të jetë kurrë dakord me shtrembërimin e ngjarjeve të saj.
Presidenti rus iu referua në fjalimin e tij edhe “operacionit ushtarak special” në Ukrainë, duke thënë se i gjithë populli mbështet trupat.
“E vërteta dhe drejtësia janë në anën tonë. I gjithë vendi, shoqëria dhe njerëzit i mbështesin ushtarët që marrin pjesë. Ne jemi krenarë për guximin dhe vendosmërinë e tyre, për këtë forcë shpirtërore që na ka sjellë gjithmonë vetëm fitore”, vuri në dukje Putin.
Pas fjalimit të presidentit rus, filloi parada madhështore ushtarake, ku morën pjesë presidenti i Kinës , Xi Jinping dhe presidenti i Brazilit, Luiz Inacio Lula da Silva , si dhe udhëheqësit e aleatëve të Rusisë, si Kazakistani, Bjellorusia, Vietnami, Armenia, Kuba dhe Venezuela.
Pavarësisht politikës së izolimit të promovuar nga Perëndimi, kryeministri sllovak Robert Fico – duke sfiduar thirrjet e Bashkimit Evropian – dhe kreu i shtetit serb Aleksandër Vuçiç janë gjithashtu të pranishëm sot në Moskë, si dhe presidenti serb i Bosnjës, Milorad Dodik, i cili është shpallur në kërkim nga drejtësia boshnjake.
Gjithashtu ushtarë nga 13 vende të tjera po marrin pjesë në paradën madhështore në Sheshin e Kuq, përfshirë ushtarë nga Kina, Vietnami, Burma dhe Egjipt.
Akuza për shkelje të armëpushimit
Presidenti rus urdhëroi që të respektohet një armëpushim nga 8 deri më 10 maj me rastin e festimeve të 9 majit. Por Ukraina, e cila është përballur me një ofensivë ruse në shkallë të gjerë që nga viti 2022, akuzoi armikun e saj dje, të enjten, për sulm përgjatë gjithë vijës së frontit, duke përmendur qindra shkelje të armëpushimit.
Në orët e para të mëngjesit sot rajonet Kherson dhe Dnipropetrovsk njoftuan se dy burra të moshës 60 dhe 83 vjeç u plagosën nga sulmet me dronë rusë.
Forcat ruse siguruan se po e “respektojnë me rigorozitet” armëpushimin, duke pretenduar se po “përgjigjen” ndaj shkeljeve të Ukrainës.
Presidenti i SHBA-së, Donald Trump, u bëri thirrje të enjten në mbrëmje të dy palëve ndërluftuese për një “armëpushim të pakushtëzuar” për 30 ditë.
Nga ana e saj, shefja e diplomacisë evropiane, Kaya Kallas, tha se Kievi dhe mbështetësit e tij do të miratojnë sot krijimin e një gjykate të posaçme për të gjykuar “krimet e agresionit rus”.
Sa i përket Mbretërisë së Bashkuar, qeveria e saj njoftoi sot sanksione të reja kundër “flotës fantazmë” të përdorur nga Rusia për të eksportuar naftën dhe gazin e saj.
Që prej ditës së martë, Moska dhe Kievi kanë vazhduar sulmet ajrore, duke shkaktuar vonesa ose anulime të qindra fluturimeve në Rusi për shkak të sulmeve nga dronë ukrainas.
Kremlini tha se po merr “të gjitha masat e nevojshme” për të garantuar sigurinë e festimeve, duke përfshirë kufizimin e aksesit në internet për kundër-dronët.
Presidenti ukrainas Volodymyr Zelensky e ka quajtur paradën ushtarake të planifikuar për në Moskë një paradë “gënjeshtrash”.
