Hamasi përsërit gatishmërinë e tij për të nënshkruar një marrëveshje armëpushimi në Gaza dhe është duke pritur përgjigjen e Izraelit, tha zyrtari i lartë i Hamasit Abdel Rahman Shadid.
“Hamasi përsërit se është gati të nënshkruajë një marrëveshje për shkëmbimin (e pengjeve izraelite me të burgosurit palestinezë) dhe tashmë ka paraqitur propozimin e tij gjithëpërfshirës për këtë çështje. Por Izraeli po pengon bisedimet. Tani, topi është në fushën e tyre”, tha ai.
Sipas zyrtarit të lartë të Hamasit, lëvizja kërkoi një armëpushim pesëvjeçar në Gaza dhe garancitë përkatëse rajonale dhe ndërkombëtare. Megjithatë, sipas fjalëve të tij, qeveria izraelite “e hodhi poshtë këtë propozim dhe refuzoi të ndërpresë armiqësitë”.
“Pavarësisht kësaj, Hamasi i siguroi ndërmjetësit se do të shqyrtojë me përgjegjësi të plotë çdo propozim që parashikon një armëpushim të përhershëm, tërheqjen e ushtrisë izraelite nga Gaza dhe një marrëveshje të drejtë shkëmbimi”, vuri në dukje ai.
Izraeli dhe Hamasi ranë dakord për lirimin e pengjeve të mbajtura në Rripin e Gazës dhe për një armëpushim në enklavë më 15 janar. Marrëveshja tre-fazore hyri në fuqi më 19 janar. Faza e saj e parë përfundoi më 1 mars. Gjatë fazës së parë, palët duhej të arrinin një marrëveshje për zbatimin e fazës së dytë të armëpushimit, por ato nuk arritën ta bënin këtë.
