Konflikti mes Shtetet e Bashkuara, Izrael dhe Iran ka hyrë në ditën e tretë, ndërsa përplasjet janë zgjeruar edhe në Liban.
Gjatë natës, Izraeli dhe Hezbollah kanë shkëmbyer zjarr, me shpërthime të raportuara në jug të Bejrut-it. Më herët, autoritetet izraelite urdhëruan evakuimin e banorëve nga mbi 50 qytete dhe fshatra libaneze, duke paralajmëruar sulme të afërta. Veprimet erdhën pasi Hezbollahu lëshoi raketa drejt territorit izraelit.
Sipas raportimeve, mbi 30 persona kanë humbur jetën në Bejrut. Ndërkohë, Teherani ka vijuar kundërpërgjigjet ndaj vendeve që i konsideron armiqësore, me shpërthime të raportuara në disa zona të Gjirit Persik, përfshirë Emiratet e Bashkuara Arabe dhe Katar.
Në reagim ndaj përshkallëzimit, Mbretëria e Bashkuar, Franca dhe Gjermania janë shprehur të gatshme për “veprime mbrojtëse”.
Presidenti amerikan Donald Trump deklaroi se operacionet kundër Iranit do të vazhdojnë “derisa të arrihen të gjitha objektivat”, duke paralajmëruar se mund të ketë viktima të tjera amerikane. Komanda Qendrore e SHBA-së konfirmoi vrasjen e tre ushtarëve amerikanë dhe plagosjen e pesë të tjerëve në një sulm iranian.
Në Izrael, raketat iraniane goditën qytetin Beit Shemesh, duke shkaktuar të paktën nëntë viktima, sipas shërbimit të emergjencës Magen David Adom — sulmi më vdekjeprurës që nga nisja e konfliktit.
Autoritetet iraniane raportuan 153 të vrarë pas një sulmi në një shkollë vajzash, ndërsa presidenti i Iranit, Masoud Pezeshkian, e cilësoi ngjarjen si një “akt barbar”.
Shpërthime janë raportuar gjithashtu në Bahrein, në qytetin irakian Erbil dhe në Jordani.
Përshkallëzimi i situatës ka ndikuar edhe në tregjet globale, me çmimet e naftës që u rritën ndjeshëm në hapjen e tregjeve aziatike, duke reflektuar shqetësimin për një konflikt të gjerë rajonal.
