Parlamenti Evropian miratoi të martën ndryshime të rëndësishme në sistemin evropian të azilit, përfshirë krijimin e një liste të përbashkët të vendeve të origjinës të konsideruara si “të sigurta” në të gjithë Bashkimin Evropian. Mes shteteve të përfshira në këtë listë është edhe Kosova.
Sipas rregullave të reja, vendet si Bangladeshi, Kolumbia, Egjipti, Kosova, India, Maroku dhe Tunizia do të trajtohen si vende të sigurta origjine për shtetasit e tyre kur aplikojnë për azil në vendet e BE-së.
Në praktikë, kjo do të thotë se procedurat e shqyrtimit të kërkesave për azil nga shtetasit e këtyre vendeve mund të jenë më të shpejta dhe me një proces të përqendruar, përveçse kur aplikanti arrin të provojë se ka frikë të bazuar mirë nga persekutimi ose rrezik serioz për sigurinë e tij nëse kthehet në vendin e origjinës.
Sipas rregullave të reja, barrë prove bie mbi aplikantin që të tregojë se situata e tij specifike e përjashton nga trajtimi si shtetas i një vendi të sigurt. Vendime të tilla mund të lidhen me faktorë si dhuna në konflikt të armatosur, nivele të larta të njohjes së azilit në të gjithë BE-në (mbi 20%), ose sanksione të lidhura me shkelje të të drejtave themelore.
Rregullat e reja përfshijnë gjithashtu vendet kandidate për në BE në listën e vendeve të sigurta origjine, përveçse kur rrethanat tregojnë diçka ndryshe.
Ndryshimet e miratuara nga Parlamenti Evropian do të hyjnë në fuqi pasi të miratohen përfundimisht nga Këshilli i BE-së, dhe pritet që zbatimi i tyre ligjor të nisë nga qershori 2026, si pjesë e reformave të mëdha në politikat e migracionit dhe azilit të Bashkimit Evropian.
