Presidenti i Francës, Emmanuel Macron, ka reaguar për herë të parë pas vjedhjes së ndodhur në Muzeun e Luvrit, duke premtuar se autoritetet do të gjejnë të tetë stolitë e vjedhura dhe se autorët do të vihen përpara drejtësisë.
“Vjedhja e kryer në Luvër është një fyerje ndaj një trashëgimie kulturore që e duam, sepse është pjesë e historisë sonë. Do t’i gjejmë veprat dhe autorët do të dalin përpara drejtësisë. Po bëhet çdo përpjekje, në çdo drejtim, për ta arritur këtë, nën drejtimin e prokurorisë së Parisit,” u shpreh presidenti francez.
Ai shtoi gjithashtu se masat për sigurinë janë tashmë pjesë e një plani të ri për mbrojtjen e trashëgimisë kulturore.
“Programi ‘Louvre Nouvelle Renaissance’, të cilin e nisëm në janar, parashikon forcimin e masave të sigurisë. Ai do të garantojë ruajtjen dhe mbrojtjen e asaj që përbën kujtesën dhe kulturën tonë,” përfundon Macron në deklaratën e tij.
Kujtojmë se tetë objekte të paçmueshme u vodhën nga Muzeu i Luvrit në Paris, në një grabitjeje spaktakolare brenda 7 minutash, që ngjan më shumë me skenë filmi sesa me një krim të zakonshëm.
Hajdutët arritën të futen në Sallën e Apolonit, ku janë ekspozuar bizhuteritë më të vlefshme dhe të rralla të koleksionit francez, dhe për vetëm shtatë minuta, çanë vitrinat e blinduara dhe morën sendet e çmuara.
Ministria Franceze e Kulturës ka publikuar një listë të bizhuterive të vjedhura nga hajdutët në shtatë minuta
Kurorë nga seti i bizhuterive të mbretëreshës Maria Amalia dhe mbretëreshës Hortense
Gjerdani nga seti i safirëve të Mbretëreshës Maria Amalia dhe Mbretëreshës Hortense:
Vathë nga seti me safirë i Mbretëreshës Maria Amalia dhe Mbretëreshës Hortense
Varëse smeraldi nga koleksioni i perandoreshës Maria Luiza
Një palë vathë smeraldi nga i njëjti set
Karficë me relike
Kurora e perandoreshës Eugenia
Karficë në formë fjongoje e perandoreshës Eugenia, një objekt unik me 2,634 diamantë, i blerë nga Luvri në vitin 2008 për 6.72 milionë euro, pasi kishte qenë më parë në një koleksion privat në SHBA.
