Irani po hakon kamerat private të sigurisë në Izrael për të mbledhur informacion në kohë reale në lidhje me vendet e sulmeve, duke ngritur shqetësime në lidhje me një problem që është dokumentuar në konflikte të tjera në të gjithë botën, sipas Bloomberg.
Pasi raketat balistike iraniane goditën ndërtesat në Tel Aviv në fillim të kësaj jave, një ish-zyrtar izraelit i sigurisë kibernetike, Rafael Franco, paralajmëroi publikisht në radio: “Ne e dimë se në dy-tre ditët e fundit, iranianët janë përpjekur të lidhen me kamerat për të parë se ku godasin dhe për të përmirësuar saktësinë e raketave të tyre. Fikni kamerat ose ndryshoni kodin.”
Franco, i cili tani drejton firmën e sigurisë kibernetike Code Blue, nuk është i vetmi që jep alarmin. Një zëdhënës i Drejtorisë Kombëtare të Sigurisë Kibernetike të Izraelit konfirmoi se kamerat e lidhura me internetin janë shënjestruar nga Irani për planifikim ushtarak.
“Ne kemi parë përpjekje të tilla gjatë gjithë luftës, dhe tani ato po rinovohen“, tha ai.
Imazhet nga vendet e sulmeve në Izrael qarkullojnë gjerësisht në mediat sociale, pavarësisht një embargoje. Kjo nuk është hera e parë që armiqtë e Izraelit kanë përdorur kamera për spiunazh: para sulmit të Hamasit më 7 tetor 2023, organizata kishte hakuar tashmë mijëra kamera private dhe publike në kufirin e Gazës për të mbledhur informacione.
Ish-shefi i Drejtorisë Kombëtare të Sigurisë Kibernetike, Gabi Portnoy, shpjegoi se “spiunimi i kamerave private nga Hamasi ishte shkatërrues” dhe se shkeljet kishin filluar vite më parë, duke monitoruar lëvizjet ushtarake dhe politike. Taktika të ngjashme janë përdorur nga Rusia në Ukrainë.
Kamerat private të mbikëqyrjes, përveçse janë të lehta për t’u instaluar, shpesh janë të ndjeshme ndaj sulmeve kibernetike. Përdorimi i tyre mund të zbulojë pa dashje pozicione ushtarake, të ndihmojë në identifikimin e objektivave ose edhe të drejtojë sulmet me bomba. Edhe pse studiuesit kanë paralajmëruar për dobësitë e sigurisë për më shumë se një dekadë, vetëm sistemet me cilësi të lartë me përditësime të rregullta të softuerit dhe instalim të duhur ofrojnë mbrojtje të vërtetë.
