Presidenti i SHBA, Donald Trump, ka zhvilluar një takim të nivelit të lartë me ekipin e tij të sigurisë kombëtare për të shqyrtuar një marrëveshje të mundshme me Iranin, por mbledhja është mbyllur pa një vendim përfundimtar dhe pa qartësi mbi hapat që do të ndiqen në vijim.
Takimi u zhvillua në Dhomën e Situatave në Shtëpinë e Bardhë, ambienti ku trajtohen çështjet më të rëndësishme të sigurisë kombëtare, ndërsa në fokus ishte një memorandum mirëkuptimi që synon zgjatjen e armëpushimit mes Uashingtonit dhe Teheranit.
Sipas burimeve amerikane, kuadri i marrëveshjes ishte dakordësuar paraprakisht nga negociatorët e të dy vendeve dhe parashikonte zgjatjen e armëpushimit për 60 ditë, si dhe nisjen e bisedimeve për të ardhmen e programit bërthamor iranian. Megjithatë, Trump nuk ka dhënë ende miratimin përfundimtar.
Presidenti amerikan ka përsëritur kushtet e tij kryesore për një marrëveshje, duke kërkuar që Irani të heqë dorë përgjithmonë nga çdo mundësi për zhvillimin e armëve bërthamore, të lejojë rihapjen e plotë të Ngushticës së Hormuzit për lundrimin ndërkombëtar dhe të asgjësojë minat detare të vendosura në zonë.
Nga ana tjetër, autoritetet iraniane kanë deklaruar se nuk po zhvillojnë negociata për programin bërthamor dhe se prioriteti i tyre mbetet përfundimi i konfliktit. Zëdhënësi i Ministrisë së Jashtme iraniane, Esmaeil Baqaei, theksoi se Teherani nuk do të ndërmarrë asnjë hap pa veprime konkrete nga pala amerikane.
Ndërkohë, Trump ka lënë të kuptohet se është i gatshëm të lehtësojë bllokadën detare në Ngushticën e Hormuzit, por ka këmbëngulur që uraniumi i pasuruar iranian të hiqet dhe të shkatërrohet nën mbikëqyrje ndërkombëtare.
Situata mbetet e tensionuar edhe për shkak të akuzave të ndërsjella për shkelje të armëpushimit. Vetëm pak ditë më parë, Garda Revolucionare Islamike e Iranit pretendoi se kishte goditur një bazë ushtarake amerikane në Kuvajt, ndërsa Komanda Qendrore e SHBA-së e cilësoi veprimin si një shkelje serioze të marrëveshjes së armëpushimit.
Pavarësisht deklaratave optimiste të javëve të fundit nga administrata amerikane, ende nuk ka një marrëveshje konkrete mes dy vendeve. Negociatat vijojnë të mbeten të bllokuara kryesisht te çështja e pasurimit të uraniumit, e konsideruar pika më e vështirë e diskutimeve.
Zhvillimet e fundit tregojnë se rruga drejt një marrëveshjeje mes Uashingtonit dhe Teheranit mbetet e pasigurt, ndërsa tensionet në Lindjen e Mesme vazhdojnë të mbajnë në alarm komunitetin ndërkombëtar.
